د غور ولایت له یو شمېر اوسیدونکو او مرکز کې د ځمکو له متصرفینو سره ددغه ولایت د تخنیکي هیئت د رئیس کتنه
د غور ولایت د ځمکو د غصب د مخنیوي د تخنیکي هیئت رئیس د ۱۴۴۴ هجري قمري کال د روژې میاشت په ۵ نېټه د دوشنبې په ورځ ددغه ولایت د مرکز اړوند د غلمین ساحې د قلعچه له یو شمېر اوسیدونکو او د ځمکو متصرفینو سره وکتل.
یاد شویو اوسیدونکو او متصرفینو ادعا درلودله چې یاده شوې ساحه د هغوی میراثي ځمکه ده او له کلنو راهیسې د هغوی تر کښت او کرنې لاندې ده او پخوانیو حکومتونو هم پرې کومه ادعا نه درلودله.
د تخنیکي هیئت رئیس د امارتي املاکو د غصب اړوند د قضیو په اړه له هغوی سره بحث وکړ او د کمېسیون او تخنیکي هیئت په اړه یې هغوی ته معلومات وړاندې کړل.
د تخنیکي هیئت رئیس له هغوی څخه وغوښتل چې له ویشل شویو استعلامونو سره سم خپل سندونه دغه هیئت ته وړاندې کړي ترڅو بررسي شي او په اړه یې لازم تصمیم ونیول شي.
