د عدلیې وزیر په افغانستان کې د ترکیې له سفیر سره وکتل
د افغانستان اسلامي امارت د عدلیې وزیر، محترم شیخ الحدیث مولوي عبدالحکیم شرعي په افغانستان کې د ترکیې هېواد له سفیر، ښاغلي جنګ اونال او د هغه له مل پلاوي سره وکتل او دواړو لورو د دواړو اسلامي هېوادونو ترمنځ د همکاریو د پیاوړتیا پر اړتیا ټینګار وکړ.
په دې کتنه کې چې د رجب المرجب د میاشتې په ۱۸مه نېټه د یکشنبې په ورځ د عدلیې وزارت په مقر کې ترسره شوه، د ترکیې د دیني چارو ادارې (دیانت) معاون او د یاد هېواد د حج او اوقافو ادارې د بهرنیو اړیکو رئیس هم ګډون درلود.
د اسلامي امارت د عدلیې وزیر په دې کتنه کې یاد پلاوي ته د ښه راغلاست ویلو ترڅنګ، افغانستان او ترکیه له ګډو دیني او فرهنګي مشترکاتو سره دوه اسلامي هېوادونه وبلل. نوموړي له افغانستان سره په بېلابېلو برخو کې د ترکیې هېواد همکارۍ وستایلې او ټینګار یې وکړ چې اړتیا ده د اسلامي امارت او ترکیې ترمنځ همکارۍ لازیاتې پراخې شي.
دغه راز نوموړي وویل چې اسلامي امارت د اصولو او ضوابطو له مخې د نړۍ له ټولو هېوادونو په ځانګړي توګه اسلامي هېوادونو سره د خپلو بهرنیو اړیکو پراخولو ته ژمن دی.
له بلې خوا په کابل کې د ترکيې سفیر، ښاغلي جنګ اونال ټینګار وکړ چې د ترکیې او افغانستان هېوادونو له یوبل سره وروڼه دي او هېواد يې ژمن دی چې په بېلابېلو برخو کې له اسلامي امارت سره همکاري ولري.
نوموړي زیاته کړه چې د ترکیې رئیس جمهور په افغانستان کې پرمختګونه په دوامداره توګه تعقیبوي او هدایت یې ورکړی چې له اسلامي امارت سره اړیکې لازیاتې پياوړې شي.
