د عدلیې وزیر د ترکیې هېواد د علماوو له یو پلاوي سره د همکاریو د پیاوړتیا او د تجربو شریکولو په اړه خبرې وکړې

د اسلامي امارت عدلیې وزیر شیخ الحدیث مولوي عبدالحکیم شرعي د ترکیې هېواد د مذهبي چارو ریاست د مرستیال، سلیم ارګون په رهبرۍ د یاد هېواد د علماوو له یو پلاوي سره وکتل او خبرې ورسره وکړې. په دې هیئت کې د یاد هېواد د دیني سازمانونو رئیسان او د پوهنتونونو ښوونکي شامل دي چې افغانستان ته یې سفر کړی.
په دې کتنه کې چې د صفرالمظفر د میاشتې په ۱۸ نېټه د پنجشنبې په ورځ د عدلیې وزارت په مقر کې ترسره شوه، د عدلیې وزیر یاد هیئت ته د ښه راغلاست ویلو ترڅنګ، افغانستان او ترکیه د دیني او مذهبي مشترکاتو لرونکي دوه هېوادونه وبلل. 
نوموړي زیاته کړه چې حنفي مذهب د دواړو هېوادونو له مشترکاتو څخه دی چې له سیاست څخه نیولې تر اقتصاد، د بشر حقونو او د حکومتولۍ نظام ټولې برخې پکښې شاملې دي.
دغه راز د اسلامي امارت، عدلیې وزیر په یاد هېواد کې د افغانستان له ولس څخه د ترکیې د هرکلي قدرداني وکړه او زیاته یې کړه چې د ژوند د هغو آسانتیاو له کبله چې په ترکیې هېواد کې برابرې دي، افغانان لیوالتیا لري چې هلته ژوند وکړي. 
نوموړي په افغانستان کې د قانون جوړونې او په هېواد کې د عدالت پلي کولو په اړه هم خبرې وکړې او ټینګار یې وکړ چې د افغانستان ټول قوانین د الله له کتاب، د رسول الله له سنتو او د حنفي فقهې له معتبرو سرچینو څخه تخریج کېږي او زیاته یې کړه چې د عدلیې وزارت په دې برخه کې په کلکه کار کوي.
دغه راز د عدلیې وزیر د عدالت پر تطبیق ټینګار وکړ او ویې ویل چې اسلامي امارت چمتو دی په دې برخه کې د ترکیې هېواد له تجربې او د یاد هېواد له علماوو ګټه پورته کړي.
له بلې خوا په دې کتنه کې د ترکیې هېواد د علماوو د پلاوي رئیس او غړو وویل چې د افغانستان او ترکیې اړیکې له سلو کالو څخه زیاته مخینه لري او دواړه هېوادونه په بېلابېلو برخو کې همکاري لري. هغه وویل چې افغانستان او ترکیه دوه اسلامي هېوادونه دي چې کولای شي د یوبل له تجربو څخه ګټه پورته کړي.
هغوی وویل چې د عدلیې وزارت دنده ستونزمنه ده ځکه چې د عدالت پلي کول آسانه کار نه‌دی او ډېر وګړي هم په‌تمه دي چې عدالت پلي شي او ټینګار یې وکړ چې د نظام او اقتصاد له پیاوړتیا سره عدالت هم په سمه توګه تطبیق کېږي.
دغه راز د ترکیې هېواد علماوو وویل چې د ترکیې هېواد په افغانستان کې له اړوندو بنسټونو سره په حقوقي او د عدالت په ټولو برخو کې د همکاریو او تجربو شریکولو ته چمتو دی او د اسلامي امارت له تجربو څخه به هم ګټه پورته کړي.