د عدلیې وزیر د اروپايي ټولنې له سفیر سره وکتل
د اسلامي امارت د عدليې وزارت سرپرست شیخ الحدیث مولوي عبدالحکیم شرعي د ربیع الاول میاشتې په ۸ نېټه د سه شنبې په ورځ د اروپايي ټولنې له سفیر توماس نیکلسون او ملګري پلاوي سره د دغه وزارت په مقر کې وکتل.
په دغې کتنه کې دواړو لورو د قوانینو، امنیت، بشري حقونو، له ترهګرۍ سره د مبارزې او نورو مسایلو په اړه خبرې وکړې.
په دغې کتنه کې، ښاغلي نیکلسون د قوانینو په اړه معلومات وغوښتل چې په دغې اړه څومره کار شوی او څومره یې پرمختګ کړی، د دغو قوانینو مرجع او اساس کوم دي، چې د عدليې وزیر له لوري په دغې برخه کې مفصل معلومات وړاندې شول.
دغه راز د اسلو ناستې په اړه چې په ناروې هېواد کې د اسلامي امارت د استازو او د اروپايي ټولنې د استازو ترمنځ جوړه شوې وه، خبرې وشوې. دغه ناسته ډېره بریالۍ وبلل شوه او د عدليې وزیر د دغې ناستې د ژمنو د عملي کېدو غوښتنه وکړه.
ښاغلي نیکلسون په افغانستان کې د بشري حقونو د چارو د ملګرو ملتونو د ځانګړي راپور ورکونکي له لوري د چمتو شوي راپور په اړه خپله اندیښنه څرګنده کړه چې د دغو انديښنو د لري کولو له پاره د عدليې وزیر له لوري ځواب ورکړل شو.
همدغه راز په دغې کتنه کې د افغانستان د ټولیز امنیت د تامین، اقتصادي او نورو برخو کې د فعالیتونو او پرمختګونو او د اسلامي امارت د شفافې ادارې په اړه هم معلومات وړاندې شول. د عدليې وزیر افغانستان کې د امنیت د تامین په اړه ډاډ ورکړ او ویې ویل چې ټول افغانستان د اسلامي امارت تر کنترول لاندې دی او هیڅ ډول اندیښنه شتون نه لري. هغه زیاته کړه چې خلک له اسلامي امارت څخه راضي دي او اسلامي امارت هم د ولس په چوپړ کې دی.
ښاغلي نیکلسون له ترهګرۍ سره د مبارزې او خلکو ته د خدمتونو د وړاندې کولو په اړه خپله اندېښنه څرګنده کړه چې د عدليې وزیر له لوري هغوی ته ډاډ ورکړل شو. د عدليې وزیر ترهګرۍ سره مبارزه د اسلامي امارت مسوولیت وباله او ويې ویل چې اسلامي امارت د ترهګرۍ مخالف دی او له ترهګرۍ سره په مبارزه کې دی. هغه ډاډ ورکړ چې اسلامي امارت د ولس خدمت ته ژمن دی.
د عدليې وزیر د اروپايې ټولنې له سفیر څخه وغوښتل چې پر اسلامي امارت سیاسي او اقتصادي فشارونه پای ته ورسوي او اوسنی حکومت په رسمیت وپېژني.
