د عدلیې وزارت مسلکي معین معرفي شو
شیخ عبدالکریم حیدر چې د افغانستان اسلامي امارت د مقام له لوري د عدلیې وزارت د مسلکي معین په توګه ټاکل شوی، د ۱۴۰۱ د وري په ۱۷ مه نېټه د چهارشنبې په ورځ د رسمي مراسمو په ترڅ کې د عدلیې وزارت د سرپرست، د دې وزارت د رئیسانو او نورو مسوولینو په حضور کې معرفي شو او په کار یې پیل وکړ.
د عدلیې وزارت د مسلکي معین د معرفۍ مراسم د قرآن کریم د څو مبارکو آیاتونو په تلاوت سره پیل شول. د عدلیې وزارت سرپرست شیخ الحدیث مولوي عبدالحکیم شرعي، په دې مراسمو کې وویل چې په نظام کې مقرري، تغییر او تبدیل یو عادي امر او د حکومتولۍ اصل دی او ددې وزارت مسلکي معین ته یې د بریالیتوب دعا وکړه.
نوموړي د اسلامي امارت بریا او د اشغال پای ته په اشارې څرګنده کړه چې اوس زموږ د ټولو فریضه د اسلامي نظام ساتنه ده. شیخ صاحب زیاته کړه چې د نظام د ساتنې لپاره اصلي شرط اطاعت دی او د مخکیني نظام د ماتې له لاملونو څخه یو هم نه اطاعت و.
د عدلیې وزارت مسلکي معین شیخ عبدالکریم حیدر هم په خپلو خبرو کې ټینګار وکړ چې تېر ۲۰ کلن جهاد تر ټولو زیات ویاړ دی او مهمه نه ده چې اوس څوک کوم رسمي موقف ولري. نوموړي د افغانستان ۲۰ کلن اشغال ته په اشارې ټینګار وکړ چې دغه اشغال په تاریخ کې مخینه نه درلوده ځکه د نړۍ تر ټولو زبرځواکو هېوادونو په یوه وخت افغانستان اشغال کړ او ددغو زبرځواکو هېوادونو ماتې د مجاهدینو په واسطه هم بې مخینه و چی د الله متعال په نصرت سره ترسره شوه.
شیخ عبدالکریم حیدر چې د عدلیې وزارت د مسلکي معین په توګه ټاکل شوی له دې مخکې د هرات د والي د مرستیال، د بادغیس د والي د مرستیال او په دوحه کې د اسلامي امارت د مرکچي پلاوي د غړي په توګه کار کړی دی.
