د عدلیې وزارت مسلکي معین د اسلامي همکارۍ سازمان له مرستیال سره وکتل
د اسلامي امارت د عدلیې وزارت مسلکي معین، محترم شیخ الحدیث مولوي عبدالکریم حیدر د اسلامي همکارۍ سازمان له مرستیال او افغانستان لپاره د یاد سازمان ځانګړي استازي، محترم طارق علي بخیت سره وکتل او خبرې ورسره وکړې.
دا کتنه د شعبان د میاشتې په ۱۷مه نېټه د یکشنبې په ورځ د عدلیې وزارت په مقر کې ترسره شوه او د افغانستان عمومي وضعیت، د قوانینو د تسوید څرنګوالي او په نورو برخو کې د پرمختګونو په هکله په کې بحث او خبرې وشوې.
د عدلیې وزارت مسلکي معین یاد پلاوي ته د ښه راغلاست ویلو ترڅنګ ټینګار وکړ چې د اسلامي امارت له حاکمیت سره په افغانستان کې امنیت او ثبات تأمین شوی او په هېواد کې د جرمونو کچې د پام وړ کموالی موندلی دی.
دغه راز نوموړي د قانون جوړونې په تړاو وویل چې اوسمهال قوانین د الله تعالی د کتاب، د رسول الله صلی الله علیه وسلم د سنتو او په اجتهادي مسایلو کې د حنفي فقهې د معتبرو سرچینو په اساس تسوید، تدقیق او نهايي کېږي. نوموړي زیاته کړه چې لویدیځۍ رسنۍ د افغانستان له وضعیت څخه ناسم او غیر واقعي انځور وړاندې کوي او له بده مرغه نړۍ هم د همدغه انځور له مخې وضعیت ته ګوري.
د عدلیې وزارت مسلکي معین روښانه کړه چې په تېرو څلورو کلونو کې په ټولو برخو کې زیات پرمختګونه ترسره شوي چې د تصور وړ نه وو او د بهرنیو پلاوو سفرونه هم اړین دي ترڅو دغه حقیقتونه منتقل کړي.
د اسلامي همکارۍ سازمان مرستیال او افغانستان لپاره ځانګړي استازي، محترم طارق علي بخیت په دې کتنه کې د قانون جوړونې په بهیر کې د پرمختګونو په اړه چې تر کومه حده پر قوانینو کار شوی، معلومات وغوښتل او د عدلیې وزارت مسلکي معین له نوموړي سره لازم معلومات شریک کړل.
نوموړي همدارنګه د اسلامي همکارۍ سازمان د غړو هېوادونو لهخوا د افغانستان په اړه اندیښنې مطرح کړې او ویې ویل چې افغانستان ته د خپل تازه سفر راپور به د دغه سازمان له غړو سره شریک کړي ترڅو دغه اندیښنې لرې شي.
