د عدلیې وزارت مسلکي معين د قندهار ولایت له عدلیې ریاست څخه ليدنه وکړه
د عدلیې وزارت د مسلکي معين، محترم شيخ الحدیث مولوي عبدالکريم حيدر په مشرۍ ولایتونو ته د یاد وزارت د پلاوي د سفرونو په لړ کې، یاد پلاوي تېره اونې، قندهار ولایت ته سفر وکړ او د یاد ولایت له عدلیې رياست څخه یې کتنه وکړه او خلکو ته، د یاد رياست د خدمتونو وړاندې کول یې هم له نږدې بررسي کړل.
د عدلیې وزارت محترم مسلکي معین او له هغه سره مل پلاوي د یاد ولایت، عدلیې ریاست له کارکوونکو او مسؤولینو سره په کتنه کې، هغوی ته د چارو ښه پرمخ وړلو او خلکو ته د خدمت کولو په برخه کې توصیه وکړه او په دې هکله یې لازمې لارښوونې وکړې.
مؤظف پلاوي د یاد ولایت د عدلیې ریاست د کارکوونکو د فعالیت د څرنګوالي په بررسۍ سره، د کاري نیمګړتیاو لرې کولو په برخه کې هم هغوی ته لازمې توصیې وکړې.
په ورته مهال، د عدلیې وزارت مسلکي معين د قندهار ولایت د معاملاتو لارښوونې د اتحادیې له یو شمېر مسؤولينو سره هم یوه ناسته جوړه کړه، د هغوی ستونزې یې واورېدې او د حل په برخه کې یې ډاډ ورکړ.
همدارنګه د یاد سفر په ترڅ کې مؤظف پلاوي، د قندهار ولایت د سپین بولدک ولسوالۍ د سيمه ییزو مسؤولينو په ګډون د یادې ولسوالۍ له یو شمېر موټر پلورنکو سره هم ناسته جوړه کړه، په دې ناسته کې ټينګار وشو چې، موټرپلورنکي دې د فعالیت جواز د عدلیې له وزارت څخه ترلاسه کړي او خپلې ټولې کړنې دې په اصولي ډول ترسره کړي.
