د عدلیې وزارت مالي او اداري رئیس او د حقوقي مرستو رئیس معرفي شول
د اسلامي امارت د عدلیې وزارت د حقوقي مرستو رئیس او مالي او اداري رئیس د روان کال د محرم الحرام په ۱۵ نېټه د شنبې په ورځ، د یو لړ مراسمو په ترڅ کې د عدلیې وزارت د قانون جوړونې د چارو د انستېتیوت لوی رئیس مفتي فضل هادي صاحب زاده له لوري د دې ریاست کارکوونکو ته معرفي شول، او په کار يې پېل وکړ.
په دې مراسمو کې، د مالي او اداري پخوانی رئیس محترم مولوي رحمت الله حقاني د حقوقي مرستو رئیس په حیث په دوه یمه رتبه بست کې او د پلان او پالیسۍ پخوانی رئیس محترم مولوي عبدالقادر شریفي د دې وزارت د مالي او اداري رئیس په حیث په دوه یمه رتبه بست کې معرفي شول.
د قانون جوړونې د چارو د انستېتوت لوی رئیس محترم مفتي فضل هادي صاحب زاده د یادو رئیسانو د معرفي وخت کې تغییر او تبدیل د اداري نظام د چارو ښه والي له پاره یو پېژندل شوی اصل وګڼه او پخوانیو بستونو کې د هغوی کړنې په نیکۍ سره یادې کړې.
هغه نوموړو رئیسانو ته د نوو دندو مبارکي وویله او هغوی ته يې د بریالیتوب هیله وکړه.
