د عدلیې وزارت د بهرنیو اړیکیو رئیس معرفي شو
محترم مولوي صاحب محمد شریف جهادیار چې د ریاست الوزراء د مقام د حکم پربنسټ د عدلیې وزارت د بهرنیو اړیکیو د نوي رئیس په توګه ټاکل شوی دی، د ۱۴۰۰ د کب په ۲۲ مه د یکشنبې په ورځ په رسمي توګه د دې ریاست کارکوونکو ته ور وپېژندل شو.
د عدلیې وزارت د بشري سرچینو رئیس محترم مولوي رحمت الله حلیم، د بهرنیو اړیکیو د رئیس د پېژندنې ترڅنګ نوموړي ته د نوی دندې مبارکي وویله او هغه ته یې د لا بریالیتوب هیله وکړه.
مولوي محمد شریف جهادیار یو علمي شخصیت دی او د دیني علومو ترڅنګ یې، عصري علوم هم په بېلا بېلو پوهنتونونو کې ویلي دي. نوموړي د اسلامي امارت په مختلفو برخو کې دنده ترسره کړې او په اداري کار کې هم کافي تجربه لري.
