د عدليې وزارت د مرکزي رییسانو د اداري ناستې جوړیدل
د اسلامي امارت د عدليې وزارت د مرکزي رییسانو اداري ناسته د ربیع الثاني میاشت په ۲۵ نېټه د یکشنبې په ورځ د مالي او اداري معین مولوي عبدالغني فایق په مشرۍ او ددغه وزارت د مرکزي رییسانو او مسوولینو په ګډون ددغه وزارت په مقر کې جوړه شوه.
په دغې ناسته کې، د مدافع وکیلانو د انجمن د لګښتونو او اړوندو چارو په اړه د موظفې کمېټې د اماده شوې طرحې، د بې سندو (یو کیلي) موټرو پېر او پلور کې د معاملو د لارښوونو منځګړیتوب، د عدليې وزارت د کارکوونکو د رتبې تفویض د هغوی د جهاد دورې سره سم او په همدې توګه د عدليې وزارت د ۱۴۰۲ کال د تشکیل په اړه بحث او د نظرونو تبادله ترسره شوه.
په یاده ناسته کې، د مدافع وکیلانو رییس مولوي سید حبیب الحبیب په مرکز او زونونو کې د مدافع وکیلانو د انجمن د ودانۍ د کرایې، د ساتونکو معاشونو، د بریښنا پیسې او باقیاتو او نورو مواردو په اړه د موظفې کمېټې له لورې جوړه شوې طرحه وړاندې کړه او د ناستې ګډونوالو په دغې برخه کې خپل نظرونه او وړاندیزونه مطرح کړل. په یاده ناسته کې پرېکړه وشوه چې په دغې ناسته کې مطرح شوي نظریات او وړاندیزونه په یاده طرح کې ځای پر ځای شي او په راتلونکې ناسته کې وړاندې شي.
دغه راز په یاده ناسته کې د بې سندو (یو کیلي) موټورو پېر او پلور کې د معاملو د لارښوونو منځګړیتوب په اړه بحث وشو او پریکړه وشوه چې د عدليې وزارت د معاملو د لارښوونو رییس د کورنۍ چارو وزارت او د ترافیکو له ریاست سره مشوره وکړي او په دغې برخه کې معلومات راټول کړي ترڅو په راتلونکې ناسته کې له هغو سره سم پریکړه وشي.
دغه راز په یاده ناسته کې د عدليې وزارت د هغه شمېر کارکوونکو چې تېرو شلو کلنو کې يې جهاد کړی دی د هغوی جهادې دورې سره سم د رتبې د تفویض په اړه بحث وشو، او اړوندو مسوولینو ته دنده وسپارل شوه چې په دغې برخه کې معلومات راټول او په راتلونکې ناسته کې يې وړاندې کړي ترڅو په دغې برخه کې تصمیم ونیول شي.
په یاده ناسته کې د عدليې وزارت د ۱۴۰۲ کال د تشکیل په اړه هم بحث وشو او پرېکړه وشوه چې تشکیل به د مرکزي او ولایتي ریاستونو د نظریاتو له راټولولو او د هغو د اړتیاوو له پام کې نیولو څخه وروسته جوړ شي.
