د سرپل ولایت د ځمکو د غصب مخنیوي د تخنیکي هیئت د ناستې جوړیدل
د سرپل ولایت د ځمکو د غصب مخنیوي د تخنیکي هیئت ناسته د عدليې رئیس (د هیئت سرپرست) او د دغه هیئت د غړو په حضور سره جوړه شوه او د ځمکو د غصب په اړه ځینې قضیې په کې بررسي شوې.
په دغې ناسته کې، د یو شخص د ځمکو سندونه په پشت قره سیمه کې بررسي شول او پریکړه وشوه چې د موضوع په تړاو له مرکز څخه لارښوونه وغوښتل شي. دغه راز د سید آباد (خانقا ملکي) کلي د اوسیدونکو دعوا د هغوی د څړځای ویجاړولو په اړه بررسي شوه او له هیئت سره د موضوع د اړیکي د نه شتون له کبله پریکړه وشوه چې یاده دعوا کرنې ریاست ته راجع شي.
په همدې توګه د اشخاصو یو شمېر دعوا او عریضې هم بررسي شوې او په اړه یې لازم تصمیمونه ونیول شول.
تخنیکي هیئت راتلونکي ورځ د آسیا آباد کلي د یو شمېر اوسیدونکو پر ځمکو د سندونو او د اظهارنامې فورم د تطبیق له پاره دغې ساحې ته ولاړ. یاد هیئت د سندونو او د استعلامونو د ځوابیو له بررسۍ څخه وروسته د کلي اوسیدونکو ته ابلاغ وکړ چې د املاکو د اساس د دفتر او د قیدیت د سوابقو په پام کې نیولو سره په اوچي کلان سیمه کې د یو شمېر اشخاصو زمیندارۍ څرګنده نشوه.
دغه راز یاد هیئت د یو شمېر نورو اوسیدونکو سندونه او د اظهارنامې فورم بررسي کړ او په دغې ساحه کې د ۶ جریبه للمي ځمکې زمیندارۍ د یو شخص په نوم قیدیت درلود. د یاد شخص د اظهار نامې پر بنسټ ساحه کې دوقطعې للمي ځمکه چې ۳۷ جریبه په کې شامله وه چې د هغې ساحوي تطبیق او کروکي ترسره شوه.
