د زابل ولایت د عدليې ریاست اداري ناسته جوړه شوه
د زابل ولایت د عدليې ریاست اوونیزه اداري ناسته د ربیع الثاني میاشت په ۱۳ نېټه د سه شنبې په ورځ ددغه ولایت د عدليې رییس الحاج مولوي عبدالوارث خلیل په مشرۍ جوړه شوه.
په دغې ناسته کې د عدليې رییس د موضوع په اړه خبرې وکړې او ددغه ریاست کارکوونکو ته یې لارښوونه وکړه چې باید د دعوت او ارشاد ریاست ټولې لارښوونې او امرونه په دغه ریاست کې عملي کړي. هغه ټینګار وکړ چې د سرغړونې په صورت کې به له سرغړونکو سره اصولي اجراات وشي.
د عدليې رییس ددغه ریاست کارکوونکو ته توصیه وکړه چې خپل صورت او سیرت له نبوي سنتو سره سم عیار کړي او خپلې دندې د اصولو په چوکاټ کې ترسره کړي. دغه راز هغه د یاد ریاست کارکوونکو ته لارښوونه وکړه چې رسمي وختونو ته پابنده اوسي او خپل حاضري په ټاکل شوو وختونو کې لاسلیک کړي.
ددغې ناستې په پای کې د عدلیې ریاست کارکوونکو ژمنه وکړه چې خپل دندې او مسوولیتونه به په بشپړ اخلاص او صداقت سره ترسره کړي.
