د جوزجان ولایت د ځمکو د غصب د مخنیوي د تخنیکي هیئت ناسته جوړه شوه
د جوزجان ولایت د ځمکو د غصب د مخنیوي د تخنیکي هیئت ناسته د روژې د میاشت په ۱۱ نېټه د یکشنبې په ورځ د هیئت د رئیس او غړو په حضور سره جوړه شوه او له ځینو ساحو څخه هم لیدنه وشوه.
په دغې ناسته کې د غصب شویو ځمکو په اړه د هیئت د سکرتریت راپور چې د هغو دوسیې له محکمې څخه راجع شوې وه، وړاندې شوه او مشخصه شوه چې یو اندازه امارتي ځمکې د جوزجان ولایت په بېلابېلو ساحو کې غصب شوي دي.
د راپور په اساس، د حمام ساحه د تفحصاتو آمریت ملکیت د خلکو لخوا غصب شوی او تاسیسات په کې جوړه شوې دي. د جوزجان مرکز په سه شنبه کلي کې هم یو اندازه امارتي ځمکه د ځايي اوسیدونکو لخوا غصب شوې ده.
هیئت د سه شنبې کلي غصب شوې ساحې له نږدې څخه ولیدلې او بررسي کړې او له ځايي مشرانو او اوسیدونکو سره یې وکتل او هغوی ته یې د امیرالمومنین حفظه الله د فرمان، کمېسیون او اړوند مقررې په اړه معلومات وړاندې کړل.
په یادو ساحو کې کرکیله، تاسیسات جوړول، د ژورو او نیمه ژورو څاګانو کیندل ترسره شوي او هیئت مسلکي ټیم موظف کړ ترڅو ساحه او د هغې اصولي او شرعي سندونه بررسي کړي او راپور یې هیئت ته وړاندې کړي.
د مرنجان، کوکلداش، ترکستان ښارګوټي، منګوتي، د افغانګاز تصدۍ، جګدلیک، پمپ خانه او د خواجه دوکوه، قوشتپه او د جوزجان ولایت د مرکز ولسوالیو ترمنځ د عامه مرعی ځمکې په ساحو کې د غصب شویو امارتي ځمکو د بررسۍ او سندونو راټولولو له پاره د توظیف شوي ټیم راپور هم وړاندې شو.
د توظیف شوي ټیم د راپور پر اساس، د ځینو ساحو بررسۍ بشپړې شوي او د ځینو نورو ساحو اوس هم دوام لري چې د بشپړ شویو ساحو راپور به ډیر ژر کمېسیون ته واستول شي.
