د جوزجان ولایت د ځمکو د غصب د مخنیوي د تخنیکي هیئت د ناستې جوړیدل
د جوزجان ولایت د ځمکو د غصب د مخنیوي د تخنیکي هیئت ناسته ددغه هیئت د رئیس او غړو په حضور سره جوړه شوه او د مرکزي کمېسیون لخوا استول شوي لیکوونه او دوسیې په کې بررسي شوې او مشخصه شوه چې یادې شوې دوسیې لازیاتو څېړنو ته اړتیا لري. یاد هیئت توظیف شویو ټیمونو ته لارښوونه وکړه ترڅو پاتې څېړنې بشپړې کړي او راپور یې تخنیکي هیئت ته وړاندې کړي.
په دغې ناسته کې، د بررسۍ، کروکي، د مساحت تعیین، برآورد په تړاو او په مرنجان، کوکلداش، سه شنبه، منګوت، د افغانګاز، جګدلیک، پمپ خانه کې د غصب شویو امارتي ځمکو د اصولي سندونو راټولولو او خواجه دوکو، قوشتپه او د جوزجان مرکز ترمنځ د عامه څړځای د غصب شویو ځمکو په اړه د توظیف شويو ټیمونو راپور وړاندې شو.
د دغه راپور پر بنسټ، د مرکزي کمېسیون له ورکړل شویو لارښوونو سره سم د مرنجان او سنګریک کلیو په ساحو کې د غصب شویو امارتي ځمکو څیړنې او بررسۍ بشپړې شوې او ډېر ژر به د تصمیم نیونې په غرض مرکزي کمېسیون ته واستول شي.
د یادو شویو ساحو پاتې څېړنې او بررسۍ دوام لري او د قضیو او د بررسۍ لاندې ساحو د پیچلي ماهیت په نسبت او د مسلکي پرسونل، تخنیکي تجهیزاتو او وسایلو د کمښت له امله کارونه یې بشپړ شوي نه دي. یاد شوي هیئت د توظیف شویو ټیمونو په کارونو کې پر چټکتیا او جدیت، ټینګار وکړ.
