د تخار ولایت د عدلیې رئیس وپېژندل شو
د کندز ولایت د عدليې پخواني رئیس سید رفیع الله صفوي چې په وروستیو کې د تخار ولایت د عدليې رئیس په توګه تبدیل شوی دی، د یو لړ مراسمو په ترڅ کې د دغه ولایت د والي له خوا کارکوونکو او مسوولینو ته وپېژندل شو.
د تخار ولایت د عدليې رئیس د پېژندنې په مراسمو کې چې د دوشنبې ورځې د غبرګولي په ۱۷ مه د دغه ولایت د غونډو په تالار کې جوړ شوي وو، د دولتي ادارو رئیسان، د ولایتي شوری وکیلان، د مدني ټولنې استازو او د دغه ولایت د عدليې ریاست یو شمیر کارکوونکو حضور درلود.
د تخار ولایت والي ښاغلي مولوي عبدالله قرلق د دغه ولایت د عدليې رئیس په توګه د ښاغلي صفوي د پېژندنې پرمهال، دغه منصب یې هغه ته مبارکي وویله او د چارو پرمخبیولو کې د بریا هیله ورته وکړه. هغه همداراز د هېواد د عدليې وزارت له رهبرۍ څخه د تجربه لرونکو او مسلکي کسانو د ګمارلو په خاطر قدرداني وکړه او په دغه ولایت کې د ادارو ترمنځ د همغږۍ پر پیاوړتیا ټینګار وکړ.
د تخار ولایت د عدليې نوي رئیس هم د عدليې وزارت د رهبرۍ له باور څخه مننه وکړه او ژمنه يې وکړه چې د دغه ریاست ستونزو ته به رسیدګي وکړي.
په پای کې د تخار ولایت د عدليې رئیس د دغه ولایت د دفتر د رئیس او د بشري سرچینو د رئیس له لوري خپل کاري دفتر ته لارښودنه وشوه.
