د افغانستان د کارګرانو ملي اتحادیې د برخلیک ټاکلو په منظور د ناستې جوړیدل
د افغانستان د کارګرانو ملي اتحادیې (امکا) د برخلیک ټاکلو په منظور، د ذوالقعدې د میاشتې په ۱۵ نېټه د یکشنبې په ورځ د عدليې وزارت د اداري معین مولوي عبدالغني فایق په مشرې د دغه وزارت په مقر کې ناسته جوړه شوه.
په دغې ناسته کې، د عدلیې وزارت د انسجام لوی رئیس او د چارو د ادارې د لوی ریاست، د ریاست الوزرا اقتصادي معینیت، د کار او ټولنیزو چارو د وزارت، د محکمې، د استخبارتو او د عدليې وزارت د تقنین ریاست استازو ګډون کړی وو.
په دغې ناسته کې، د افغانستان د کارګرانو ملي اتحادیې (امکا) د برخلیک ټاکلو په اړه بحث او د نظرونه تبادله ترسره شوه او پریکړه وشوه چې د اړوندو ادارو استازو په ګډون یوه کمېټه جوړه شي ترڅو دغې برخه کې مقدماتي بحثونه پیل کړي او وروسته له هغې یو لنډ مهاله اداره جوړه شې ترڅو د دغې اتحاديې چارې په لنډ مهاله توګه او تر محدود وخت پرمخ یوسي او د دغې اتحادیې د رئیس او مشرتابه هیئت د تعیین له پاره زمینه مساعده کړي.
دغه راز پریکړه وشوه چې ټولې یادې شوې چارې د ټاکنو ترسره کولو او د دغې اتحاديې د رئیس او مشرتابه تعیین پورې، د ریاست الوزرا د اقتصادي معینیت په سرپرستۍ مخته یوړل شي.
