د ارزګان ولایت د ځمکو د غصب د مخنیوي د تخنیکي هیئت د ناستې جوړیدل
د ارزګان ولایت د ځمکو د غصب د مخنیوي د تخنیکي هیئت ناسته د ذوالحجې د میاشتې په ۱ نېټه د دوشنبي په ورځ د هیئت د رئیس او غړو په حضور سره جوړه شوه.
په دغې ناسته کې، د ترینکوټ ښار په ګرم آب کلي کې د یو شخص له لوري د امارتي ځمکې د غصب او پلورلو د ادعا موضوع بررسي او یاد شخص غونډې ته وغوښتل شو او له نوموړي څخه شرعي سندونه وغوښتل شول. په همدې توګه نوموړي ته لارښوونه وشوه چې د ځمکې ثابتیدلو پورې له نویو تصرفاتو څخه ډډه وکړي.
په یاده ناسته کې په خاص ارزګان ولسوالۍ کې د ۹ جریبه ځمکې موضوع چې یو شخص له هغې څخه شرعي قباله لري او د کرنې مدیر ځمکه امارتي بللې او له نوموړي څخه اخیستې، بررسي شوه. هیئت له یاد شخص څخه د قبالې تائیدي وغوښتله چې مشخص شي ځمکه شخصي ده که امارتي.
هیئت د چنارتو ولسوالۍ د شمشک کاریز موضوع چې وړاندې د تخنیکي هیئت غړو دغې ساحې ته سفر کړی وو هم بحث وکړ او دغې برخه کې لازمې لارښوونې وکړې.
د شفلوغ دښتې ساحې ته د کاري سفر په اړه خبرې وشوې چې د دغه سفر په ترڅ کې یاده دښته چې زرګونه جریبه ځمکه په کې شامله ده تشخیص شوه. یاده دښته په بشپړ ډول امارتي ده چې د بوم او شفلوغ کلیو اوسیدونکي پرې شخړه لري. تخنیکي هیئت د دواړه لورو تصرفات په ساحه کې منع کړل.
راتلونکو ورځو کې ساحو ته د هیئت د سفر په اړه هم بحث وشو او لازم تصمیم ونیول شو.
