خوست ولایت کې ۲۰۰۰ جریبه ځمکه امارتي تشخیص شوه
د خوست ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام د میاشتې په ۱۳ نېټه د یکشنبې په ورځ د هیئت د رئیس او غړو په حضور سره جوړه شوه او هیئت هم له ځینو ساحو څخه لیدنه وکړه.
له ناستې وروسته له تخنیکي هیئت څخه یو ټیم د ټني ولسوالۍ اړوند سیګۍ دښتې ته ولاړ او د یادې ساحې په لیدنې او بررسۍ ۲۰۰۰ جریبه ځمکه امارتي تشخیص کړه.
دغه راز یاد ټیم د مندوزي اسماعیل خیل ولسوالۍ ته ولاړ او د یادې ولسوالۍ له مشرانو سره یې د صنعتي پارک د موضوع په تړاو خبرې وکړې.
د تخنیکي هیئت یو بل ټیم له یو شمېر افرادو او اشخاصو سره چې د هغوی دوسیې بررسۍ لاندې دي د کرنې په ریاست کې وکتل او خبرې وکړې او هغوی ته استعلامونه ورکړل چې خپل سندونه وړاندې کړي. د ځینو اشخاصو د ځوابیو په تړاو، اړوندو ادارو ته هم استعلام واستول شو ترڅو لازم اجراآت ترسره کړي.
