د عدليې وزارت د تقنیني ستاژ او حقوقي ستاژ ښوونیز نصاب بیا کتل کېږي.
د افغانستان د اسلامي جمهوريت د عدليې وزارت د دې وزارت د داخل خدمت د تقنیني ستاژ او حقوقي ستاژ د ښوونیز نصاب د بیاکتنې په منظور یوه برنامه جوړه کړه.
دغه برنامه د دوشنبې ورځې د غويي په ۲۷ مه نېټه د عدليې وزارت د مسلکي معین عبدالمجید غني زاده او د عدلي او قضايي ارګانونو او نورو اړوندو ادارو د استازو په ګډون پیل شوه چې تر درېيو ورځو پورې به دوام ومومي.
ټاکل شوې ده په دغې برنامې کې د عدليې وزارت د داخل خدمت د تقنیني ستاژ او حقوقي ستاژ په اوسني ښوونیز نصاب کې شامل مضمونونه او موضوعات بیا وکتل شي او د ورځې له اړتیاوو سره سم د عدلي او قضايي ارګانونو په کاري برخه کې نوي حقوقي بدلونونه راشي.
د عدليې وزارت مسلکي معین د دغې درې ورځنۍ برنامې د پرانیستنې په ویناوو کې د دغه وزارت د داخل خدمت د تقنیني ستاژ او حقوقي ستاژ او د هغو د ښوونیز نصاب په اړه معلومات ورکړ. هغه له ګډونوالو څخه وغوښتل چې خپل اصلاحي لیدلوري او وړاندیزونه له دغه وزارت سره شریک کړي تر څو یو ښوونیز نصاب د ورځې له اړتیا او د عدلي او قضايي ادارو له کاري بهیر سره سم برابر شي.
د عدليې وزارت د تقنیني ستاژ برنامه هرکال د دولتي ادارو په حقوقي او تقنیني چارو د کارکوونکو او د حقوقو او شرعیاتو د څانګو د فارغانو د وړتیا لوړونې په منظور او د دغه وزارت د داخل خدمت د حقوقي ستاژ برنامه د حقوقو او د دولت د قضایاوو د ریاستونو د مسلکي کارکوونکو د وړتیا لوړونې په منظور جوړېږي.
