په کابل ښار کې د تېرې یوې میاشتې په ترڅ کې د معاملاتو لارښوونې ۱۳ دفترونه د سرغړونو له امله تړل شوي دي
د عدلیې وزارت د انسجام عمومي ریاست د معاملاتو لارښوونې او د عریضه لیکونکو د چارو ریاست د روان کال د ثور (غويي) میاشتې په اوږدو کې د معاملاتو لارښوونې له ۴۱۰ دفترونو څخه نظارت ترسره کړی.
د دغه نظارت په ترڅ کې د یادو دفترونو د ثبت کتابونه، رسمي سټې، لوحې، مهرونه او یو شمېر نور اړين اسناد بررسي شوي چې په ترڅ کې یې ۱۳ دفترونه د غیرقانوني فعالیتونو او یو شمېر سرغړونو له امله وتړل شول.
دغه راز د عدلیې وزارت د معاملاتو لارښوونې او د عریضه لیکونکو چارو ریاست د همدې مودې په اوږدو کې ۱۸۰ تنو غوښتونکو ته، د معاملاتو لارښوونې د فعالیت نوي جوازونه وېشلي او د فعالیت ۹۱ نور جوازونه یې تمدید کړي دي.
په همدې موده کې د معاملاتو لارښوونې ۲۷۱ متصدیانو ته د وساطت د اصولو او د معاملاتو د ترسره کولو د څرنګوالي په برخه کې زدهکړهییزې برنامې تطبیق شوې او اړینې زدهکړې ورته وړاندې شوې دي.
دغه راز، په همدې موده کې د ۴۰ تنو هېوادوالو عریضو او شکایتونو ته چې د کورونو د کرایې او د نورو چارو په برخه کې له ستونزو سره مخ وو، رسیدګي شوې ده.
