د فراه او نیمروز ولایتونو د عدلیې ریاستونو کارمندانو لپاره د زده کړه ییز سیمینار جوړول
د عدلیې وزارت د بشري سرچینو ریاست د فراه او نیمروز ولایتونو د عدلیې ریاستونو کارمندانو لپاره د «د امارت د قضایاوو مسلکي زده کړې» تر عنوان لاندې شپږ ورځنی زده کړه ییز سیمینار د فراه ولایت د عدلیې په ریاست کې جوړ کړ.
د یاد سیمینار په پرانیسته کې چې د شعبان د میاشتې په ۶ نېټه د شنبې په ورځ جوړ شو، د فراه ولایت د عدلیې رئیس مفتي سردار محمد مرصاد، د عدلیې وزارت د بشري سرچینو د ریاست د زده کړو او ظرفیت لوړولو آمر مفتي احمدضیا خبیب، ښوونکو او نورو مسؤولینو حضور درلود.
په دې برنامه کې د فراه ولایت د عدلیې رئیس، د ادارې د پياوړتیا او مسلکي کولو په برخه کې د دغه راز سیمینارونو جوړول مهم وبلل او ویې ویل چې د دغو زده کړو ځانګړې موخه خلکو ته ښه خدمات وړاندې کول دي. نوموړي زیاته کړه چې د نظام د پیاوړتیا، د بیت المال ساتنې او د چارو مسلکي کولو لپاره اړتیا ده له دغه سیمینار څخه اعظمي ګټه پورته شي.
له بلې خوا د عدلیې وزارت د بشري سرچینو د ریاست د زده کړو او ظرفیت لوړولو آمر نظام او هېواد لپاره د کارمندانو مسلکي کول او کادر جوړول مهم پرمختګ وباله او زیاته یې کړه چې دا لومړی سیمینار دی چې د ولسوالیو د امارت د قضایاو مدیران هم په کې حضور لري.
نوموړي له ګډونوالو څخه وغوښتل چې د یاد سیمینار زده کړې په داومداره توګه تعقیب کړي او د سیمینار له پای څخه وروسته، په خپلو کاري چارو کې ورڅخه ګټه پورته کړي.
په دغه سیمینار کې چې تر شپږو ورځو پورې داوم لري، د فراه او نیمروز د عدلیې ریاستونو ۲۵ تنو کارمندانو لپاره به د ځمکو له غصب سره د مبارزې د لارو چارو، د ځمکو د غصب د مخنیوي قانون، دعوا او د هغې ډولونو، اداري مراسلاتو او د پلان جوړونې په اړه لازمې زده کړې وړاندې شي.
