د کنړ ولایت د خیریه بنسټونو له یو شمېر مسؤلینو سره د یاد ولایت د عدلیې رئیس کتنه
د کنړ ولایت د عدلیې رئیس مفتي عبدالستار حماس د ربیع الثاني د میاشتې په ۹ نېټې د سه شنبې په ورځ د یاد ولایت د خیریه بنسټونو له یو شمېر مسؤلینو سره د عدليې ریاست په مقر کې وکتل او خبرې ورسره وکړې.
په دغې ناسته کې د عدلیې رئیس د خیریه بنسټونو له مسؤلینو څخه وغوښتل چې د عدلیې ریاست په همغږۍ خپلې مرستې په دغه ولایت کې مستحقو او بې وزله کسانو ته وویشی. دغه راز نوموړي له هغوی څخه وغوښتل چې د خیریه بنسټونو کړنلارې مطابق چې د عدلیې وزارت له لوري وضع شوې، فعالیت ترسره کړي.
د خیریه بنسټونو مسؤلینو ژمنه وکړه چې د یادې کړنلارې مطابق او د کنړ ولایت د عدلیې ریاست په همغږۍ به خپل فعالیتونه په مخ یوسي.
