د بګرامۍ ولسوالۍ له مقاماتو سره د عدلیې وزارت د حقوقي مرستو ریاست د همغږۍ او کاري ناستې جوړیدل
د عدليې وزارت د حقوقي مرستو ریاست، د ذوالقعدې میاشتې په ۱۰ نېټه د سه شنبې په ورځ د کابل ولایت د بګرامۍ ولسوالۍ له مقاماتو سره کاري او د هغمږۍ ناسته جوړه کړه.
په دغې ناسته کې، د بګرامۍ د ولسوال مرستیال، د محکمې مفتي، د استخباراتو مسؤل، د دعوت او ارشاد، د حج او اوقافو، د ښوونې، اراضۍ ادارو مسؤلینو او د نورو سیمه ییزو ادارو مسؤلینو برخه اخیستې وه، او د حقوقي مرستندویانو، حقوقي عامه پوهاوي کاري برنامې، ادارو ترمنځ کاري اړیکې او د کاري بهیر پر ښه والي يې د اغیزو په اړه بحث وشو.
په دغې ناسته کې، د حقوقي مرستو رئیس مولوي حافظ عبدالصمد عمري وویل چې د اسلامي امارت په ادارو کې د کارکوونکو د ګمارنې موخه هیوادوالو او په ځانګړي توګه د ټولنې ضعیفو، بې وسو او بې وزلو وګړو ته خدمت وړاندې کول دي. نوموړي وویل چې د حقوقي مرستو ریاست په همدې منظور رامنځته شوی ترڅو د ټولنې ضعیفه او بې وزله وګړو څخه چې شکمن، تورن، محکوم علیه یا مجني علیه شوي دي او په مزد د آزاد مدافع وکیل د نیولو توان نه لري، دفاع وشي. دغه راز د هیواد اتباعو ته پوهاوی ورکړل شي چې د خپلو حقونو او مکلفیتونو څخه خبر شي.
د یادې ناستې په پای کې، د بګرامۍ ولسوالۍ مقاماتو د عدلیې وزارت د حقوقي مرستو ریاست له کاري بهیر څخه هر کلی وکړ او ژمنه یې وکړه چې د حقوقي پوهاوي ورکوونې برنامې د تطبیق په برخه کې هر راز همکاري کوي او د بګرامۍ ولسوالۍ د محکمې په قضایي غونډو کې د حقوقي مرستندویانو د ګډون زمینه به برابره کړي.
