د هرات ولایت د ځمکو د غصب د مخنیوي د تخنیکي هیئت ناسته جوړه شوه
د هرات ولایت د ځمکو د غصب د مخنیوي د تخنیکي هیئت ناسته ددغه هیئت د رئیس او غړو په حضور سره جوړه شوه او د هیئت تر کار لاندې بېلابېل موضوعات بررسي شول.
په دغې ناسته کې د تخنیکي هیئت رئیس د هیئت د کاري بهیر پر چټکتیا او د موجودو ننګونو له پاره د حل لار پر موندلو ټینګار وکړ.
په یاده ناسته کې د کادستر مسکلي ټیمونو د مسلخ د ملکیتونو او د میرمنه کاریز دښتې په اړه خپل راپور وړاندې کړ.
توظیف شوي هیئت د ابوالولید سیمې د ۵۰۵ جریبه ځمکې د اضافه جریبي ملک بررسۍ په اړه هم خپل راپور وړاندې کړ او پریکړه وشوه چې سپینې ساحې له یاد ملک څخه تصرف کړل شي او په اجاره ورکړل شي.
دغه راز هیئت پل رنګینه کې د ښاروالۍ اړوند دوکانونو په اړه بحث وکړ او پریکړه یې وکړه چې د ښاروالۍ ملکیت د سندونو له بررسۍ او تثبیت څخه وروسته، یاد شوی ملکیت په اجاره ورکړل شي.
تخنیکي هیئت لرې پرتو ولسوالیو ته د سفر او له ولسوالانو سره یې د کتنې په اړه هم بحث وکړ او پریکړه یې وکړه چې د ولایت د مقام په همغږۍ اقدام وشي.
