بادغیس ولایت کې ۵۰۰۰ جریبه ځمکه عامه مرعی تشخیص او تثبیت شوه
د بادغیس ولایت د ځمکو د غصب د مخنیوي د تخنیکي هیئت ناسته ددغه هیئت رئیس او غړو په حضور سره جوړه شوه او پکې د دره بوم ولسوالۍ له یو شمېر اوسیدونکو سره چې پر یو اندازه للمي ځمکه یې په خپلو کې دعوا درلودله، بررسي شوه او د دعوا له دواړو لورو څخه قانوني سندونه وغوښتل شول.
دغه راز یاده ناسته کې، د بالامرغاب ولسوالۍ د چپچل د دوو تنو اوسیدونکو قضیه چې پر یو اندازه للمي ځمکه یې خپلو کې دعوا درلودله، بررسي شوه او له هغوی څخه د مالکیت قانوني سندونه وغوښتل شول. هغوی هیڅ ډول سند نه درلود او ویې منله چې د جرببر شورآبي سیمه چې کابو ۵۰۰۰ جریبه للمي ځمکې رانغاړي، د عامه مرعی ځمکو له جملې څخه دي.
هغوی ژمنه وکړه چې وروسته له دې به پر یاده شوې محدوده خپل شخصي او مالکانه تصرف و نه کړي او هم به د څارویو له پاره د واښو له استفادې څخه د نورو مخنیوی نه کوي. ددغې بررسۍ په پایله کې، یاده شوې ۵۰۰۰ جریبه ځمکه د عامه مرعی په عنوان، تشخیص او تثبیت شو.
