د ځمکو د غصب د مخنیوي کمېسیون ناسته جوړه شوه
د غصب د مخنیوي او د غصب شوو ځمکو د استرداد کمېسیون ناسته د ربیع الثاني میاشت په ۱۲ نېټه د دوشنبې په ورځ د عدلیې وزارت د سرپرست او د دغه کمېسیون رییس شیخ الحدیث مولوي عبدالحکیم شرعي په مشرۍ د عدليې وزارت په مقر کې جوړه شوه.
په دغې ناسته کې د یاد کمېسیون غړو، د افکو شرکت رییس محمود کرزي او د دغه شرکت مرستیال عبدالحمید هلمندي، د کندهار ولایت پانګوالو او د عدليې وزارت معینانو ګډون کړی وو.
په یاده ناسته کې د کندهار ولایت د عینو مینې ښار ګوټي او د پاتې کارونو بشپړېدو په اړه هر اړخیز بحث او خبرې وشوې او پرېکړه وشوه چې د عینو مینې ښارګوټي خدماتي چارې دې ژر تر ژره پیل شي او د جوړیدلو او ودانولو پاتي کارونه دې ژر تر ژره بشپړې شي.
د یادې ناستې په پای کې، د عدلیې وزارت سرپرست او د یاد کمېسیون رییس شیخ الحدیث مولوي عبدالحکیم شرعي، د افکو شرکت رییس او مرستیال او د کندهار ښار پانګوالو په یو مطبوعاتي کنفرانس کې د عینو مینې ښارګوټي په اړه خبریالانو ته معلومات ورکړل او د هغوی سوالونو ته يې ځواب وړاندې کړ.
