د دفاع وکالت د شپږمې دورې د ورودي ازموینې د اخیستو په هکله د عدلیې وزارت خبرتیا
د دفاع وکالت هغو غوښتونکو ته چې مخکې له دې یې د دفاع وکالت د شپږمې دورې د ورودي ازموینې تېرولو لپاره نوم لیکنه کړې او نومونه یې په وروستي فهرست کې شامل دي خبر ورکول کېږي چې د دفاع وکالت د شپږمې دورې ورودي ازموینه د ۱۴۰۵هـ.ش کال د ثور (غویی) د میاشتې په ۱۵ نېټه د سېشنبې په ورځ چې د ۱۴۴۷هـ.ق کال د ذوالقعدة الحرام میاشتې له ۱۸ نېټې سره سمون خوري، د عدلیې وزارت په مقر کې اخیستل کېږي.
له همدې امله له محترمو متقاضیانو څخه هیله کېږي چې لاندې ټکي په جدي توګه مراعات کړي:
۱. د دفاع وکالت په ورودي ازموینه کې د ګډون کارت یوازې له ازموینې څخه درې ورځې مخکې (د ثور په ۱۲مه) د عدلیې وزارت د مدافع وکیلانو ریاست د اداري مدیریت له خوا وېشل کېږي او د ازموینې په ورځ د شمولیت کارت نه ویشل کېږي.
۲. د ازموینې په ورځ د شمولیت کارت او د تابعیت تذکرې اصل درلودل لازمي دي او د نهلرلو په صورت کې متقاضي په ازموینه کې نه شاملېږي.
۳. غوښتونکي مکلف دي چې د ازموینې په ورځ، د سهار په ۷:۰۰ بجو د عدلیې وزارت په مقر کې حاضر وي.
۴. محترم غوښتونکي دې له هر ډول اقدام څخه مخکې، د دغې خبرتیا لاندې د دفاع وکالت د جوازلیک غوښتونکو په خپاره شوي وروستي فهرست کې د خپل نوم له موجودیت څخه ډاډ ترلاسه کړي تر څو د هغو غوښتونکو له بېځایه سرګردانۍ څخه مخنیوی وشي چې غوښتنلیکونه یې د مؤظفې کمېټې له خوا رد شوي دي.
۵. د ازموینې په ورځ د وزارت دننه د موبایل راوړل قطعاً ممنوع دي.
