په کندز ولایت کې د ۴۰۰ جریبه امارتي ځمکې تثبیت
د کندز ولایت د ځمکو د غصب د مخنیوي د تخنیکي هیئت رئیس او غړي د ربیع الثاني د میاشتې په ۲۱ نېټې د یکشنبې په ورځ د یاد ولایت د امام صاحب ولسوالۍ ته ولاړ او په دغې ولسوالۍ کې له ځینو غصب شویو ساحو څخه لیدنه او بررسي ترسره کړه.
تخنیکي هیئت د یادې ولسوالۍ د قرغان تپې ساحې ته ولاړ او د ساحې په بررسۍ سره، کابو ۴۰۰ جریبه امارتي ځمکه تثبیت کړه او د کادستر ادارې د سروې مدیریت ته لارښوونه وکړه ترڅو د ساحې کوردینات واخلي او د یادې ساحې له سکیچ او کروکي څخه وروسته، د هغې راپور وړاندې کړي.
وروسته یاد هیئت د امام صاحب ولسوالۍ برزنګي ساحې ته ولاړ او په دغې ساحې کې له ۳۱ جریبه امارتي ځمکې څخه لیدنه وکړه او کادسترې ټوټې پر یادې ساحې باندې تطبیق کړې او ساحه یې بررسي کړه.
هیئت اړوندو مسؤلینو ته لارښوونه وکړه چې د یادې ځمکې د متصرفینو د ځمکوالۍ او د هغو د سندونو د صحت او سقم په برخه کې له اړوندو مراجعو څخه معلومات وغواړي.
