په کنړ ولایت کې کابو ۱۳ جریبه غصب شوې امارتي ځمکه بررسي شوه او غاصبین یې وپېژندل شول
د کنړ ولایت د ځمکو د غصب د مخنیوي د تخنیکي هیئت ناسته د ربیع الثاني د میاشتې په ۱۴ نېټې د یکشنبې په ورځ د دغه هیئت د رئیس او غړو په حضور سره جوړه شوه او د ځمکو د غصب اړوند د یو شمېر دوسیو اصلاح شوي راپورونه په کې بحث او بررسۍ لاندې ونیول شوې او تایید شوې. هیئت پریکړه وکړه ترڅو یاد راپور ژر تر ژره مرکزي کمېسیون ته واستول شي.
دغه راز له تخنیکي هیئت څخه یو ټیم د دغه ولایت د خاص کنړ ولسوالۍ، شامکار کلي ته سفر وکړ او ۶ جریبه امارتي للمي ځمکه چې د ۳۲ تنو غاصبینو په واسطې غصب شوې، له نږدې ولیدله او بررسي کړه. دغه هیئت د یادې ځمکې مساحت، کروکي، ډول او اربعه حدود تشخیص او تفکیک کړل او د هغې د غاصبینو شهرت یې په جدول کې درج کړ.
له تخنیکي هیئت څخه یو بل ټیم لچیګلی کلي ته ولاړ او پر ۷ جریبه امارتي ځمکې باندې جوړ شوي کورونه چې د ۱۷ تنو غاصبینو له خوا ودان شوي، له نږدي ولیدل او بررسي کړل. یاد هیئت د یادې ځمکې مساحت، کروکي، ډول، بیه او اربعه حدود تشخیص او تفکیک کړل او د هغې د غاصبینو شهرت یې په جدول کې درج کړ.
