په غور ولایت کې کابو ۶۰۰ جریبه ځمکه امارتي تثبیت شوه
د غور ولایت د ځمکو له غصب څخه د مخنیوي تخنیکي هیئت په یوې ناسته کې د یاد ولایت په بېلابېلو برخو کې د سلګونو جریبو ځمکو دوسیې بررسي کړې او له دې جملې څخه یې شپږ سوه (۶۰۰) جریبه ځمکه امارتي تثبیت کړه.
په دې ناسته کې چې، د جمادی الأولی د میاشتې په ۱۵ نېټه د یکشنبې په ورځ ترسره شوه په دولتیار ولسوالۍ کې د نږدې شپږ سوه (۶۰۰) جریبه مجموعي مساحت سره د درېو قطعو ځمکو اړوند دوسیو په اړه راپور وړاندې شو او تخنیکي هیئت هغه امارتي تثبیت کړه.
هیئت پرېکړه وکړه چې یادې دوسیې دې د وروستي تصمیم نیولو په موخه مرکزي کمېسیون ته واستول شي.
دغه راز په دې ناسته کې په دولتیار ولسوالۍ او د غور په مرکز کې د څه باندې څلور سوه (۴۰۰) جریبو نورو ځمکو دوسیې بررسي شوې او تخنیکي هیئت د هغو په تړاو لازم تصمیم ونیوه.
