د لوګر ولایت د عدلیې ریاست، استیناف محکمې او مدافع وکیلانو ترمنځ د همغږۍ ناسته جوړیدل
د لوګر ولایت عدلیې ریاست د یاد ولایت له یو شمېر مدافع وکیلانو سره د همغږۍ ناسته جوړه کړه او د هغوی ستونزې یې بررسي کړې. دغه راز یاد ریاست د دغو ستونزو د لرې کولو په موخه د استیناف محکمې له ریاست سره ناسته جوړه ترسره کړه.
د عدلیې ریاست او مدافع وکیلانو ناسته د جمادی الأولی د میاشتې په ۹ مه نېټه د دوشنبې په ورځ د عدلیې رئیس، مولوي عبدالمالک، د یاد ریاست د نورو مسؤولینو او د یو شمېر مدافع وکیلانو په ګډون د لوګر، عدلیې ریاست په مقر کې ترسره شوه.
په دې ناسته کې د لوګر ولایت مدافع وکیلانو خپلې کاري ستونزې د عدلیې له رئیس سره شریکې کړې او د عدلیې رئیس د یادو ستونزو په تأییدولو سره، د هغو د حل په برخه کې هغوی ته د همکارۍ ډاډ ورکړ.
په همدې موخه د عدلیې ریاست د لوګر ولایت د استیناف محکمې له رئیس سره یو ناسته جوړه کړه او عدلیې رئیس د مدافع وکیلانو د استازي په حضور کې یې، د هغوی ستونزې د دغې محکمې له رئیس سره شریکې کړې او د لرې کولو غوښتنه یې وکړه.
د لوګر ولایت د استیناف محکمې رئیس، مولوي شمسالله عزیزي په دې ناسته کې وویل چې په دې برخه کې ستونزې شتون لري او دا محکمه به یې د لري کولو په برخه کې هڅې او لازمه همکاري وکړي.
