د عدلیې وزارت مسلکي معين د بلخ ولایت د والي له مرستیال سره وکتل
د عدلیې وزارت د مسلکي معين، شيخ الحدیث مولوي عبدالکريم حيدر په مشرۍ د یاد وزارت د پلاوي د سفرونو په لړ کې، یاد پلاوي د ربیعالاول د میاشتې په ۱۲ مه نېټه د شنبې په ورځ بلخ ولایت ته سفر وکړ او د یاد ولایت له سیمه ییزو مسؤولینو سره یې وکتل.
یاد پلاوي د دغه دوه ورځني سفر په ترڅ کې د بلخ ولایت د والي له مرستيال، مولوي نورالهادي ابو ادریس سره وکتل او د بلخ ولایت د عدلیې ریاست سره یې د ولایت د مقام او نورو سیمه ییزو ادارو پر همکارۍ ټینګار وکړ.
د عدلیې وزارت پلاوي د دغه سفر په ترڅ کې د بلخ ولایت له عدلیې ریاست څخه هم لیدنه وکړه او خلکو ته د یاد ریاست د خدمتونو وړاندې کولو څرنګوالی یې له نږدې بررسي کړ.
دغه راز د عدلیې وزارت مسلکي معین او له هغه سره مل پلاوي د بلخ، عدلیې ریاست له کارمندانو او مسؤولینو سره په کتنه کې، هغوی ته د چارو ښه پرمخ وړلو او خلکو ته د خدمت کولو په برخه کې توصیه وکړه او په دې هکله یې لازمې لارښوونې وکړې.
پلاوي د بلخ ولایت د عدلیې ریاست د کارمندانو د فعالیت د څرنګوالي په بررسۍ سره، د کاري نیمګړتیاو لرې کولو په برخه کې هم هغوی ته لازمې توصیې وکړې.
په ورته مهال، د عدليې وزارت مسلکي معین د بلخ ولایت د مدافع وکیلانو، سوداګرو او زرګرانو اتحادیې غړو سره هم ناسته جوړه کړه، د هغوی ستونزې یې واورېدې او د حل په برخه کې یې ډاډ ورکړ.
