د عدليې وزارت د رهبرۍ شورا ناسته د شيخ الحديث مولوي عبدالحکيم شرعي په مشرۍ جوړه شوه
د اسلامي امارت د عدليې وزارت د رهبرۍ شورا ناسته د سهشنبې په ورځ، د شوال په ۱۷مه نېټه د عدليې وزير، محترم شيخ الحديث مولوي عبدالحکيم شرعي په مشرۍ او د اداري او مسلکي معينانو او د دغه وزارت د مرکزي رئيسانو په ګډون جوړه شوه.
په دې ناسته کې د کاري چارو د چټکتيا، د وزارت په کچه د امر بالمعروف او نهی عن المنکر قانون د تطبيق او نورو موضوعاتو په اړه بحث او خبرې وشوې.
د عدليې وزير په دې ناسته کې وويل چې د نظام مسئولین باید د اشخاصو لپاره نه، بلکې نظام لپاره کار وکړي او د نظام پر وړاندې اخلاص ولري.
هغه ټینګار وکړ چې د وزارت ټول مسئولين او کارکوونکي باید تقوا ولري، له خلکو سره ښه چلند وکړي، وخت او حاضرۍ ته پابنده واوسي او خپل مسئولیتونه په غوره توګه ترسره کړي او د هغوی له کارونو څخه څارنه وشي.
همداراز محترم شيخ الحديث مولوي عبدالحکيم شرعي په وزارت کې د امر بالمعروف او نهی عن المنکر د قانون پر تطبیق ټينګار وکړ او اړوندو مسئولینو ته يې لازمې لارښوونې وکړې.
