د عدليې وزير د خصوصي روغتونونو له مسؤولينو او ډاکټرانو سره وکتل
د اسلامي امارت د عدليې وزير، محترم شيخ الحديث مولوي عبدالحکيم شرعي د محرم په ۲۰مه نېټه د دوشنبې په ورځ د خصوصي روغتونونو له یو شمېر مسؤولینو او ډاکټرانو سره وکتل او خبرې وکړې.
په دې کتنه کې چې د عدليې وزارت په مقر کې ترسره شوه، د عدليې وزير وويل چې ډاکټران انسانيت او ټولنې ته د خدمت په برخه کې لوړ مقام او حيثيت لري او اړينه ده چې خپل ځای او حيثيت وپېژني. نوموړي ټينګار وکړ چې په دنيا او آخرت کې عزت د خلکو په خدمت کولو کې نغښتی دی او د خصوصي روغتونونو له مسؤولينو څخه يې وغوښتل چې خلکو ته په صادقانه ډول خدمت کولو کې هڅه وکړي.
دغه راز محترم شيخ الحديث مولوي عبدالحکيم شرعي په دې کتنه کې څرګنده کړه چې د خصوصي روغتونونو مسؤولین دې له هر ډول حزبي فعاليتونو او حزبي وابستګۍ څخه ډډه وکړي؛ ځکه په هېواد کې د سياسي ګوندونو فعاليت ممنوع دی او ښې پایلې نه لري او ډاکټرانو لپاره هم مناسبه نه ده چې کوم حزب يا تنظيم پورې تړلي وي.
د اسلامي امارت د عدليې وزير د خصوصي روغتونونو د اتحاديې د فعاليت د څرنګوالي او دغې اتحاديې لپاره د نوي رئيس د ټاکلو په اړه هم خبرې وکړې او ويې ويل چې د اتحاديې فعاليت بايد د اسلامي امارت د اصولو او قوانينو مطابق وي.
په دې کتنه کې د خصوصي روغتونونو مسؤولينو هم د خصوصي روغتونونو د اتحاديې د فعاليت په اړه لازم معلومات شریک کړل او ډاډ يې ورکړ چې د قوانينو او اصولو په چوکاټ کې به فعاليت کوي.
