په ننګرهار ولایت کې د یو شمېر اتحادیو له فعالیتونو څخه نظارت ترسره شو
د ننګرهار ولایت د عدلیې ریاست نظارتي پلاوي د صفرالمظفر د مياشتې په ۷مه نېټه د چهارشنبې په ورځ، د دغه ولایت د مرکز جلالآباد ښار په بېلابېلو ناحیو کې د معاملاتو لارښوونې د دفترونو اتحادیه او د څوکيدارانو له اتحادیې څخه نظارت ترسره کړ او د هغو فعالیتونه یې بررسي کړل.
د دغه نظارت په ترڅ کې د یادو اتحادیو د فعاليت جوازونه، مهرونه، رسمي کتابونه، د اجراآتو راپورونه او یو شمېر نور اسناد بررسي شول چې په پایله کې یې د دغو اتحادیو په کاري چارو کې ځینې نیمګړتیاوې مشخصې شوې.
نظارتي پلاوي د دغو نیمګړتیاوو د لرې کولو او د کاري چارو ښه پرمخ وړلو په موخه د یادو اتحادیو مسؤولينو ته لازمې توصیې وکړې.
د ننګرهار ولایت د عدلیې رياست په دوامداره توګه په یاد ولایت کې له اړوندو برخو څخه نظارت ترسره کوي ترڅو له غير قانوني فعالیتونو څخه مخنيوی وشي.
