په پروان ولایت کې د معاملاتو لارښوونې له یو شمېر دفترونو څخه نظارت ترسره شو
د کورونو د کرایې د کنټرول ګډې کمېټې په پروان ولایت کې د شوال د مياشتې په ۲۰مه نېټه د سېشنبې په ورځ د دغه ولایت په مرکز چاريکار ښار کې د معاملاتو لارښوونې له ۵ دفترونو او د زدهکړيالانو د خصوصي ليلیو ۶ دفترونو څخه نظارت ترسره کړ.
د یاد نظارت په ترڅ کې د یادو دفترونو متصديانو ته توصیه وشوه چې له هغو معاملاتو ډډه وکړي چې د کورونو او د زدهکړیالانو د لیلو د کرایې د لوړېدو لامل ګرځي او د هغو کورنو په کرایې ورکولو څخه هم ډډه وکړي چې د ۱۴۰۳ کال پرتله یې کرایه له لس سلنې څخه ډېره شوې وي.
یادې کمېټې د دغه نظارت په ترڅ کې د کورونو د ۶ تنو کرایه ناستو شکایتونو هم ترلاسه او په هکله یې لازم اقدامات ترسره کړل.
د کورونو د کرایې د کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي د مشاهدې په صورت کې به له سرغړونکو اشخاصو سره جدي چلند وکړي.
