د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته جوړیدل
د ځمکو له غصب څخه د مخنیوي کمېسیون رهبرۍ د عدلیې وزیر او د کمېسیون رئیس محترم شیخ الحدیث مولوي عبدالحکیم شرعي په مشرۍ په یوې ناسته کې د هېواد په ۷ ولایتونو کې د زرګونو جریبو ځمکو موضوعات تر بررسۍ لاندې ونیول.
په دې ناسته کې چې د رجب المرجب د میاشتې په ۱۳مه نېټه د شنبې په ورځ د عدلیې وزارت په مقر کې ترسره شوه، د کرنې، اوبو لګولو او مالدارۍ وزیر محترم مولوي عطاءالله عمري، د کور او ښار جوړلو وزارت مرستیال محترم الحاج محمد ارسلاح خروټي، د سرحدونو، قومونو او قبایلو وزارت معین محترم مولوي عنایت الله شجاع، د چارو ادارې د عمومي ریاست مرستیال محترم مولوي عبدالباري، د سترې محکمې استازی محترم مولوي محمد حماد، د کرنې وزارت د اراضۍ عمومي رئیس محترم مولوي محمود مظلوم، د امارت د قضایاوو عمومي رئیس او د کمېسیون سکرتر محترم احسان الله وثیق او نورو مسؤولینو ګډون درلود.
په دې ناسته کې د ځمکو له غصب څخه د مخنیوي کمېسیون رهبرۍ په کندوز، ننګرهار، بلخ، غزني، پکتیکا، سرپل او هرات ولایتونو کې د څه باندې ۵۰ زره جریبو ځمکو د دوسیو، د هېواد په شمال زون کې د مرعی ځمکو (څړځایونو) د سروې او یو شمېر نورو موضوعاتو په اړه بحث او خبرې وکړې.
په یاده ناسته کې پرېکړه وشوه چې په کندوز ولایت کې د سیند غاړې سلګونه زره جریبه ځمکه دې د اړوندې ادارې په همغږۍ تصفیه شي. دغه راز په ننګرهار ولایت کې د یوې دښتې د څه باندې ۴۴ زره جریبه ځمکې په تړاو پرېکړه وشوه چې ټوله یاده شوې ځمکه امارتي ملکیت دی او کرنې وزارت ته دې وسپارل شي.
د ځمکو له غصب څخه د مخنیوي کمېسیون په دې ناسته کې پرېکړه وکړه چې ځینې دوسیې دې اړوندو اختصاصي محکمو ته وسپارل شي. همداراز پرېکړه وشوه چې د عامه مرعی (څړځایونو) د بررسۍ مؤظف پلاوی دې شمالي ولایتونو ته سفر وکړي او مرعی ځمکې دې بررسي کړي.
