د عدلیې وزارت لخوا لسګونو بېوزلو زیانمنو، شکمنو او تورنو ته حقوقي مرستې وړاندې شوې
د اسلامي امارت د عدلیې وزارت د حقوقي مرستو رياست د روان کال د محرمالحرام د میاشتې په ترڅ کې لسګونو بیوزلو زیانمنو، شکمنو او تورنو ته حقوقي مرستې وړاندې کړي او د هغوی له شرعي او قانوني حقوقو څخه يې په محکمو کې دفاع کړې ده.
د عدلیې وزارت د حقوقي مرستو ریاست حقوقي مساعدینو د همدې مودې په اوږدو کې د محکمو په ۱۰۰ قضايي ناستو کې ګډون کړی او د خپلو مؤکلینو له شرعي او قانوني حقوقو څخه یې دفاع کړې ده.
همداراز په دې موده کې حقوقي مساعدینو له لوري ۲۷۰ ځله د بېوزلو زیانمنو، شکمنو او تورنو قضیې تعقیب شوي او ۲۵ تنو غوښتونکو ته وړیا حقوقي مشورې وړاندې شوي دي.
په ورته مهال د عدلیې وزارت د حقوقي مرستو رئيس، مولوي جان محمد «محمد طلحه» او مل پلاوي د سترې محمکې، استيناف محکمې او د کابل ولایت مقام له مسؤولينو سره د همغږۍ بېلابېلې ناستې ترسره کړي او په دغو ناستو کې یې د حقوقي مرستو وړاندې کولو، د عامه پوهاوي د برنامو جوړولو او د حقوقي مساعدینو اړوند د یو شمېر موضوعاتو په اړه بحثونه او خبرې کړي دي او یادو برخو کې په لا زیاتو همغږۍ ټينګار شوی دی.
د عدلیې وزارت د حقوقي مرستو ریاست په مدني او جزائي قضیو کې بېوزلو زیانمنو، شکمنو او تورنو اشخاصو ته وړیا حقوقي مرستې وړاندې کوي او په محکمو کې د هغوی له حقوقو څخه دفاع کوي ترڅو عدالت په سمه توګه تأمین شي.
