د کنړ ولایت د عدلیې رياست او یو شمېر خيريه بنسټونو مسؤولينو ترمنځ د همغږۍ ناسته جوړه شوه
د کنړ ولایت د عدلیې رياست د انسجام مديريت پلاوي د جمادي الثاني د مياشتې په ۲۲ مه نېټه د دوشنبې په ورځ، په یاد ولایت کې د خيريه بنسټونو له یو شمېر مسؤولينو سره وکتل.
په دې کتنه کې چې د لا زياتې همغږۍ او همکارۍ په موخه ترسره شوه، له مستحقو او اړمنو کسانو سره د خیریه بنسټونو پر مرستو کولو ټينګار وشو. دغه راز د عدلیې ریاست مسؤولینو له خیریه بنسټونو څخه وغوښتل چې له خلکو سره ښه چلند وکړي، په قانوني ډول فعالیت ترسره کړي او په خپل وخت له دغه ریاست سره د خپلو فعالیتونو راپور شریک کړي.
په دې کتنه کې د خیریه بنسټونو مسؤولینو هم خبرې وکړې او ژمنه یې وکړه چې پورته موارد به عملي کړي او له عدلیې ریاست سره به همکار وي.
