د عدلیې وزارت د حقوقي مرستو ریاست او د کابل اتمې ناحیې مسؤولینو ترمنځ د همغږۍ ناسته جوړیدل
د عدلیې وزارت د حقوقي مرستو رئيس مفتي احمد ضیا خبیب او د کابل ښار اتمې ناحيې د مسؤولينو او ګذر وکيلانو ترمنځ د همغږۍ ناسته د محرم الحرام د مياشتې په ۱۷ مه نېټه د سه شنبې په ورځ د یادې ناحیې په مقر کې جوړه شوه.
په دې ناسته کې چې د لا زياتې همغږۍ رامنځته کولو په موخه جوړه شوې وه، د وړیا حقوقي مرستو وړاندې کولو او حقوقي مشورو وړاندې کولو د څرنګوالي، په جزائي او کورنیو قضیو کې حقوقي مرستو ته لاسرسی او ناحیې اوسېدونکو ته حقوقي پوهاوي د برنامو پلي کولو موضوعاتو په اړه بحث او خبرې وشوې.
په دې ناسته کې د عدلیې وزارت د حقوقي مرستو رئیس وویل چې یاد ریاست د مرکز او ولایاتو په کچه په جزايي قضیو کې ټولو بېوزلو شکمنو او تورنو او په کورنیو قضیو کې بېوزلو ښځو او ماشومانو لپاره وړیا حقوقي مرستې او مشورې وړاندې کوي.
په یاده ناسته کې د اتمې ناحیې مسؤولينو د عدلیې وزارت د حقوقي مرستو رياست له فعاليتونو څخه خوښي څرګنده کړه او د همکارۍ ډاډ یې ورکړ.