د کابل ښار په بګرامۍ ولسوالۍ کې د نعیم کوچي د زوی او نورو غاصبانو تر غصب لاندې کابو ۱۱۴۵ جریبه غصب شوې ځمکه استرداد شوه
د ځمکو له غصب څخه د مخنیوي او غصب شویو ځمکو د استرداد کمېسیون مسئولیت دا دی چې له غاصبینو زور واکو او غیر شرعي ذوالید څخه د بیت المال او امارتي ځمکې را وګرځوي چې دا کار د افغانستان په ټولو ولایاتو کې په چټکۍ روان دی تر دې وخته لله الحمد تقربیاً دوه میلیونه جریبه ځمکه د افغانستان په مختلفو ولایاتو کې استرداد شوېده دا چې دا د کمېسیون مسئولیت ده د خپل مسئولیت پر بناء خپل کارونه پرمخ وړي فقط. نه د چا سره شخصي خصومت لري او نه هم کوم بل هدف تعقیبوي، مسئولیت یې یواځې د امارتي(حکومتي) عامه مرعی او قفي غصب شویو ځمکو استرداد او د دغه ځمکو له غصب څخه مخنیوی دی. دغه کمېسیون په څنګ کې څلور اختصاصي محکمې او په هر ولایت کې د غصب شویو ځمکو د تشخیص او تثبیت تخنیکي هیئتونه لري. چې ټول دغو موخو ته د رسېدلو لپاره کار کوي.
د همدې مسئولیت پر بناء د کابل ولایت د (۲۲) ناحیې اړوند د علاءالدین خیلو د کلي موضوع د امارت د قضایاوو د عمومي ریاست له طریقه د ۱۴۴۴/۱۲/۳ نېټې (۳۲۸۱) ګڼه لیک په اساس د ځمکو د غصب د مخنیوي او غصب شویو ځمکو د استرداد اختصاصي محکمې ته استول شوې وه، یادې محکمې د یادې موضوع په اړه ۱۴۴۵/۶/۱۱ هـ.ق نېټې (۱۵/۲) ګڼه فیصله صادره کړې او د ۱۴۴۵/۶/۱۳ نېټې (۱۷۵) ګڼه لیک په اساس یې دې ادارې ته رالېږلې ده، لکه څرنګه چې یاده فیصله ولوستل شوه نوموړې محکمې (۵۵۵) جریبه ځمکه چې د ۱۳۲۱/۱۲/۲۶ نېټې (۷۴۹۳/۹۴۶) ګڼه قبالې درلودونکې ده د اشخاصو په نفع حکم صادر کړی او متباقي ځمکه یې امارتي بللې او د استرداد حکم یې صادر کړی دی.
دغه فیصله د ۱۴۴۵/۶/۲۳ هـ.ق نېټې د (۳۹۶۰ پر ۲۶۸۸) ګڼې لیک په ذریعه د کرنې، اوبو لګولو او مالدارۍ محترم وزارت ته راجع شوه او هغه محترم وزارت د فیصلې د تطبیق لپاره د مظلوم صاحب په مشری هیئت توظیف کړ. دغه توظیف شوي هیئت د علاءالدین خیلو د کلي لپاره (۵۵۵) جریبه ځمکه چې د اختصاصي محکمې د فیصلې په اساس شخصي ملکیت بلل شوی وه، تفکیک او هغه یې بیله او خط اندازي کړه.
د دغه خط اندازۍ په اساس د لوګر ولایت اوسیدونکی حاجي حیدر جان د حاجي نعیم کوچي د زوی قلعه له خط څخه بهر په امارتي ملکیت کې واقع شوې وه که څه هم د ځمکو له غصب څخه د مخنیوي او غصب شویو ځمکو د استرداد کمېسیون حاجي حیدر جان ته وخت ورکړ څو د فیصلې مطابق امارتي املاک تخلیه او خپله ذمه فارغه کړی ولې هغه اصولو ته غاړه نه ایښودله او د محکمې له حکم څخه یې تمرد کاوه، بناءً نوموړی د عالي قدر امرالمؤمنین حفظه الله تعالي د ۱۴۴۴/۱۱/۷ هـ.ق نېټې د (۳۹۳۲) ګڼې حکم د دوه یمې مادې د (۲) فقرې د حکم په اساس توقیف او د اختصاصي محکمې د فیصلې مطابق امارتي ملکیت مقلوعاً د نوموړي او نورو غاصبانو له تصرف څخه تخلیه کړل شو.
