د کسبګرو اتحادیې د موضوع د حل په منظور په عدلیې وزارت کې ناسته جوړه شوه
د کسبګرو اتحادیې د موضوع د حل په منظور د عدلیې وزارت مسلکي معین شیخ الحدیث مولوي عبدالکریم حیدر او د صنعت او سوداګری وزارت د صنعت او سوداګری چارو معین مولوي قدرت الله جمال په ګډون د عدلیې وزارت په مقر کې ناسته جوړه شوه.
په دې ناسته کې چې د روژې د میاشتې په ۲ نېټه د سه شنبې په ورځ جوړه شوه د عدلیې وزارت د انسجام عمومي رئیس مولوي حافظ عبدالصمد عمري، د کسبګرو د اتحادیې رئیس او د انسجام عمومي ریاست نورو مسؤولینو هم په کې حضور درلود.
په دې ناسته کې د کسبګرو اتحادیې د ستونوزو او موضوعاتو په اړه بحث او د نظر تبادله ترسره شوه او د عدلیې وزارت مسلکي معین ټینګار وکړ چې دا موضوع دې د خبرو اترو له لارې حل او فصل شي.
په یاده ناسته کې پریکړه وشوه چې د یادو ستونزو د حل په منظور د عدلیې وزارت د انسجام عمومي ریاست د مسؤولینو، د صنعت او سوداګرۍ وزارت او د یادې اتحادیې د استازو په ترکیب یوه کمېټه جوړه شي او د موضوعاتو په حل دې کار وکړي.
