په تېرې یوې میاشت کې د څه باندې ۱۴۳ زره جریبه امارتي ځمکې استرداد
د ځمکو د غصب د مخنیوي تخنیکي هیئتونو د ۱۴۴۵ هجري قمري کال د جمادي الثاني د میاشتې په اوږدو کې د هېواد په ۷ ولایتونو کې کابو ۱۴۳ زره او ۴۲۷.۳۵ جریبه امارتي ځمکه له بررسۍ او تثبیت څخه وروسته، استرداد کړه او هغه یې اړوندو ادارو ته تسلیم کړه.
دغه راز د ځمکو د غصب د مخنیوی تخنیکي هیئتونو د یادې میاشتې په اوږدو کې څه دپاسه ۳۵۷ زره او ۶۶۰ جریبه امارتي ځمکه د افغانستان په ۲۶ ولایتونو کې تثبیت کړې او کابو ۵۴۰ زره او ۶۲۸ جریبه نوره ځمکه هم په ولایتونو کې تر بررسۍ لاندې نیولې ده.
د تېرې یوې میاشتې په ترڅ کې تر ټولو زیاتې استرداد شوې ځمکې په کندز او سرپل ولایتونو کې موقعیت لري چې ۱۳۵ زره جریبه ځمکه په کې شامله ده.
د امارتي ځمکو د بررسۍ، تثبیت او استرداد بهیر په ټولو ولایتونو کې دوام لري او د غصب شویو زرګونو جریبو امارتي ځمکو دوسیې، د ځمکو د غصب د مخنیوي کمېسیون او په ولایتونو کې د یاد کمېسیون د تخنیکي هیئتونو تر بررسۍ لاندې دي.
