د مدافع وکیلانو د عالي کمېسیون دوه یمه ناسته جوړه شوه
د مدافع وکیلانو د عالي کمېسیون دوه یمه ناسته د روان هجري قمري کال د جمادي الاول میاشتې په ۱۵ نېټې د چهارشنبې په ورځ د عدليې وزارت د مسلکي معین شیخ الحدیث مولوي عبدالکریم حیدر په مشرۍ او د فرمانونو او حکمونو د تعقیب او نظارت د لوی ریاست مرستیال، د استخباراتو د لوی ریاست مرستیال او د سترې محکمې، د کورنیو چارو وزارت، د ملي دفاع وزارت، او د زندانونو چارو ادارې د استازو او د عدلیې وزارت د مدافع وکیلانو او د حقوقي مساعدتونو د رئیسانو او د مدافع وکیلانو د استازو په ګډون د عدليې وزارت په مقر کې جوړه شوه.
دغه ناسته د کلام الله مجید د څو آیاتونو په تلاوت او د عدلیې وزارت د مسلکي معین په پيلیزې وینا سره پیل شوه او په هغې کې د عدلیې وزارت د مدافع وکیلانو رئیس مولوي سید حبیب الحبیب د یادې ناستې له غړو سره راپورونه او عمومي معلومات شریک کړل.
وروسته د مدافع وکیلانو استازو، هغه ستونزې چې مدافع وکیلان په محکمو، محبسونو، استخباراتي بنسټونو او امنیتي حوزو کې له هغو سره مخ دي، وړاندې کړل او د هغو د حل لارو غوښتونکي شوو.
په دغې ناسته کې پریکړه وشوه چې د مدافع وکیلانو ستونزو ته به د یادو ادارو له لوري په بشپړه توګه رسیدګي وشي.
په دغې ناسته کې په ذیربطو ادارو کې د مدافع وکیلانو د انسجام کړنلارې د تطبیق په اړه هم بحث او د نظرونو تبادله ترسره شوه او پریکړه وشوه چې دغه کړنلاره په ټولو اړوندو ادارو کې په بشپړ ډول تطبیق شي.
همدا راز یاد کمېسیون پریکړه وکړه چې د حقوقي مساعدتونو عالي کمېسیون د مدافع وکیلانو له عالي کمېسیون سره ادغام شي او یاد کمېسیون د مدافع وکیلانو او حقوقي مساعدتونو د عالي کمېسیون په نوم ونومول شي.
