هرات ته د عدلیې وزارت د نظارتي هیئت سفر؛ له عدلیې ریاست څخه لیدنه او له دارالوکالو څخه نظارت
د عدلیې وزارت نظارتي هیئت د یاد وزارت د مدافع وکیلانو د رئیس مولوي سیدحبیب الحبیب په مشرۍ او د حقوقي مساعدتونو رئیس مولوي رحمت الله حقاني، د ټولنو او ټولنیزو بنسټونو د چارو رئیس مولوي محمد یاسین حقاني او د عدلیې وزارت د نورو مسلکي غړو په غړیتوب، د ربیع الاول د میاشتې په ۲۴ نېټې د دوشنبې په ورځ د هرات ولایت له عدلیې ریاست څخه لیدنه وکړه.
یاد هیئت د هرات ولایت د عدلیې له رئیس او د دغه ریاست له کارمندانو سره وکتل او د یاد ریاست له بېلابېلو برخو څخه یې لیدنه وکړه. یاد هیئت د دغه ریاست د کارمندانو ستونزې او غوښتنې واوریدې او د هغو د حل په برخه کې لازمې لارښوونې وکړې.
یاد شوي هیئت د عدلیې ریاست له مسؤلینو سره ژمنه وکړه چې د هغوی ستونزې به د هرات ولایت او د عدليې وزارت له مقاماتو سره شریکې کړي او د هغو د حل په برخه کې به له هیڅ ډول هلو ځلو څخه ډډه و نه کړي.
د یاد شوي نظارتي هیئت یو شمېر غړو د عدلیې ریاست له لیدنې څخه وروسته د هرات ښار د لومړۍ ناحیې له دارالوکالو څخه هم بررسي او نظارت ترسره کړ.
له دغو بررسي شویو دارالوکالو څخه ۵ دارالوکالو ته چې لوحې یې د هغو د جوازلیکونو مطابق نه وې او یوه بله دارالوکاله چې له موکلینو سره يې په قرارداد کې د مقاولاتو له کتاب څخه ګټه نه وه پورته کړې، توصیې او لازمې لارښوونې وشوې.
د هرات ولایت د عدلیې ریاست د مدافع وکیلانو آمر ته هم دنده ورکړل شوه چې د دوو میاشتو په اوږدو کې په دغه ولایت کې له ټولو دارالوکالو څخه نظارت وکړي او د هغو راپور د عدلیې وزارت د مدافع وکیلانو له ریاست سره شریک کړي.
