بدخشان ولایت ته د ځمکو د غصب د مخنیوي کمېسیون د مشرتابه پلاوي سفر
د ځمکو د غصب د مخنیوي او د غصب شویو ځمکو د استرداد کمېسیون مشرتابه پلاوي د عدلیې وزارت د سرپرست او د یاد کمېسیون د رئیس شیخ الحدیث مولوي عبدالحکیم شرعي په مشرۍ د ربیع الاول د میاشتې په ۱۰ نېټې د دوشنبې په ورځ د ځمکو د غصب اړوندو دوسیو د بررسۍ په منظور بدخشان ولایت ته سفر وکړ او د دغه ولایت له مقاماتو او سیمه ییزو مسؤلینو سره یې وکتل او خبرې ورسره وکړې.
په دغه سفر کې دکور او ښار جوړولو د وزارت سرپرست مولوي حمدالله نعماني، د کرنې او اوبو لګولو د وزارت سرپرست مولوي عطاء الله عمري، د چارو د ادارې لوی رئیس شیخ الحدیث مولوي نورالحق انور، د سترې محکمې استازي شیخ عبدالصمد حقاني او د امارت د قضایاو لوی رئیس او د دغه کمېسیون سکرتر مولوي احسان الله وثیق او د یاد کمېسیون نورو غړو د عدليې له وزیر سره ملتیا وکړه.
د یاد کمېسیون مشرتابه د بدخشان ولایت د والي له مرستیال مولوي عبدالجمیل سایس او له نورو مقاماتو او سیمه ییزو مسؤلینو سره ناسته جوړه کړه او د ځمکو د غصب د مخنیوي او د غصب شویو امارتي ځمکو د استرداد په تړاو په کې خبرې وشوې.
د عدلیې وزارت سرپرست هم په دغې ناسته کې د موضوع په تړاو خبرې وکړې او یاد ولایت ته د دغه کمېسیون د مشرتابه پلاوي د سفر موخې د بدخشان ولایت د ځمکو د غصب د مخنیوي د تخنیکي هیئت د فعالیتونو بررسي او ارزول، د امارتي او غیر امارتي ځمکو تشخیص او بررسي، د ځمکو د مستحقینو پېژندل او نور مسایل یاد کړل.
نوموړي زیاته کړه چې اسلامي امارت د عدالت پر بنسټ ولاړ دی او هر څوک چې د اسلامي امارت تر چتر لاندې ژوند کوي، باید پوه شي چې د کوم حق او شرعي حقوقو درلودونکي دي او باید خپلو ټولو شرعي او اسلامي حقوقو ته لاسرسی ولري.
د عدلیې وزارت سرپرست د ارشاد، حج او اوقافو له ریاست او د دغه ولایت د علماوو له شورا څخه وغوښتل چې د یاد کمېسیون د فعالیتونو، اړوند قانون او د ځمکو غاصبینو لپاره د الهي عذاب په اړه، خلکو ته پوهاوی ورکړي.
دغه راز نوموړي د یاد ولایت له سیمه ییزو مسؤلینو او اوسیدونکو څخه وغوښتل چې د غاصبینو د لست، د ځمکو سندونو په برابرولو او د یاد ولایت د تخنیکي هیئت د امنیت د تامین په برخه کې هر اړخیزه همکاري وکړي، ترڅو د هیئت غړي وشي کولی چې خپل کارونه په ښه توګه بشپړ او عملي کړي.
په دغې ناسته کې د یاد کمېسیون نورو غړو هم د امارتي ځمکو د غصب د مخنیوي په اړه خبرې وکړې ویې ویل چې د د ځمکو د غصب مخنیوی او د غصب شویو امارتي ځمکو استرداد د اسلامي امارت له لومړیتوبونو څخه دي او اسلامي امارت مصمم دی چې غصب شوې ځمکې بېرته له زورواکو څخه واخلي. هغوی په یاد ولایت کې د ځمکو د غصب د مخنیوي له تخنیکي هیئت سره د سیمه ییزو ادارو په همکارۍ ټینګار وکړ.
په یاده ناسته کې، د عدلیې وزارت د امارت د قضایاو لوی رئیس وویل چې یاد کمېسیون د تېر کال په ترڅ کې ۷۰۰ زره جریبه امارتي ځمکې تشخیص کړي چې له دغې جملې څخه د هغو ۱۸ زره په بدخشان ولایت کې دي.
د بدخشان ولایت د والي مرستیال په یاده ناسته کې وویل چې د یاد ولایت د مشرانو او د ادارو د مشرتابه حضور، د خلکو د ستونزو او ننګونو د لري کولو، د سیمه ییزې حکومتولۍ د پياوړتیا او پر دولت د خلکو د باور د زیاتیدلو سبب ګرځي. نوموړي وویل چې بدخشان ولایت له لري پرتو او صعب العبورو ولایتونو له جملې څخه دی چې د تېرو حکومتونو په مهال ورته ډیره پاملرنه نه ده شوې او دغه ولایت په بېلابېلو برخو کې اساسي او بنسټیزو خدمتونو ته اړتیا لري.
دغه راز نوموړي د ادارو ترمنځ په همغږۍ ټینګار وکړ او د کمېسیون مشرتابه ته یې له کمېسیون او اړوند تخنیکي هیئت سره د هر اړخیزې همکارۍ ډاډ ورکړ.
په یاه ناسته کې د بدخشان ولایت مقاماتو او سیمه ییزو مسؤلینو هم د دغه ولایت له تخنیکي هیئت او د ځمکو د غصب د مخنیوي له کمېسیون سره د بشپړې همکارۍ ډاډ ورکړ.
د ځمکو د غصب د مخنیوي کمېسیون مشرتابه پلاوي په یاد ولایت کې د ځمکو د غصب اړوند یو شمېر دوسیې هم بررسي کړې او په دغې برخه کې د یاد ولایت تخنیکي هیئت ته لازمې لارښوونې وکړې.
