کندز ولایت کې څه دپاسه ۱۲ جریبه ځمکه استرداد شوه
د کندز ولایت د ځمکو د غصب د مخنیوي د تخنیکي هیئت ناسته د ذوالحجې د میاشتې په ۲۲ نېټه د دوشنبې په ورځ د هیئت د رئیس او غړو په حضور سره جوړه شوه او له ادارو څخه یو شمېر استول شوي دوسیې بررسي شوې.
په یاده ناسته کې د عسقلان ساحې ۲۹ جریبه ځمکې موضوع بررسي او یاده ځمکه امارتي تثبیت شوه چې په راتلونکې غونډه کې به د هغې په اړه تصمیم ونیول شي.
په همدې توګه هیئت د ګلتپې ولسوالۍ په توبره کش ساحه کې د یو جریب او ۵ سوې ځمکې ساحه بررسي او یاده ځمکه استرداد کړه او هم یې د هغې اجارې ورکوونې پړاونو تېرولو په اړه لارښوونه وکړه.
په یاده ناسته کې د آلتي ګنبد ساحې ۱۱ جریبه ځمکې دوسیه چې وړاندې تثبیت او تشخیص شوې وه، بررسي شوه او یاده ځمکه استرداد شوه او د هغې اجارې ورکوونې په اړه لارښوونه صادر شوه.
هیئت په یاده ناسته کې د رستاق آباد، نازکمیر سرفراز، فیض آباد او آریانا ښارګوټو د سندونو تطبیق په منظور د توظیف شویو ټیمونو راپورونه، هم بررسي کړل او لارښوونه وکړه چې د هغو عمومي راپور ترتیب او مرکزي کمېسیون ته وړاندې شي.
