د کنړ ولایت له ځینو ساحو څخه د یاد ولایت د تخنیکي هیئت لیدنه
د کنړ ولایت د ځمکو د غصب د مخنیوي تخنیکي هیئت رئیس او غړي د ذالقعدې د میاشتې په ۲۲ نېټه د یکشنبې په ورځ د کنړ ولایت بېلابېلو ساحو ته ولاړ او د ځمکو د غصب د مخنیوي په برخه کې لازم اقدامات ترسره کړل.
یاد شوی هیئت په دریو کاري ټيمونو وویشل شو او یو ټیم د امارتي قطعاتو د تثبیت او تشخیص په منظور د خاص کنړ ولسوالۍته سفر وکړ. یاد شوي ټیم د دغې ولسوالۍ له مقاماتو او سیمه ییزو مسؤلینو سره ناسته جوړه کړه او د هغو اړوند مقرراتو او اصولو په اړه يې معلومات وړاندې کړل او له هغوی څخه د همکارۍ غوښتونکی شو چې ځایي مسؤلینو هم د هر اړخیزې همکارۍ ډاډ ورکړ.
د هیئت غړو د یادې ولسوالۍ له یو شمېر عارضینو سره وکتل او له هغوی سره یې د هغوی د موضوعاتو په تړاو خبرې وکړې او یو شمېر اشخاص یې خپل راتلونکې غونډې ته د کرنې په ریاست کې وغوښتل او له یو شمېر نورو څخه یې هم سندونه وغوښتل.
دغه راز د یاد هیئت غړو د شالي ولي ساحې له اوسیدونکو سره وکتل او د ځمکو د اجارې ورکولو په اړه یې هغوی ته معلومات ورکړل او ټینګار یې وکړ چې هره پریکړه د سندونو او اصولو پر اساس ترسره کیږي او د هیچا حق به نه ضایع کېږي. تخنیکي هیئت هغوی ته وویل چې د سیند غاړې او د غرونو د لمنو ځمکې ټولې امارتي دي او هیڅوک امارتی ځمکې په غیرقانوني ډول په اجاره نه شي ورکولی.
په همدې توګه هیئت د خاص کنړ بیلي ساحې ته ولاړ او د یو اندازه ځمکې له غصب څخه یې مخنیوی وکړ او پر متصرفینو يې ټینګار وکړ چې نور امارتي ځمکو کې کرکیله و نه کړي. په سرکاڼو ولسوالۍ کې هم هیئت پر یو ټوټه ځمکې د کار مخنیوی وکړ.
د تخنیکي هیئت بل ټیم د ۸۶۴ کادستري ټوټي د ۱۰ غاصبینو کورونو جدول ترتیب کړ او غاصبین یې هم مشخص کړل.
د دغه هیئت دریم ټیم د ډنډونو امارتي ساحې قطعې ته ولاړ او د یادې قطعې ۹۱ غاصبینو شهرت یې په جدول کې درج کړ او هم یې په ساحه کې د نوي کار او تصرفاتو مخنیوی وکړ.
