د لوګر ولایت د ځمکو د غصب د مخنیوي تخنیکي هیئت د دغه ولایت د ځینو ساحو له قومي مشرانو سره وکتل
د لوګر ولایت د ځمکو د غصب د مخنیوي د تخنیکي هیئت ناسته د ذوالقعدې د میاشتې په ۲۲ نېټه د یکشنبې په ورځ د دغه هیئت د رئیس او غړو او د دغه ولایت د ځانګړې محکمې د غړو په حضور سره جوړه شوه.
یاد شوي هیئت د بېلابېلو موضوعات د بحث سربېره، د یو شمېر ساحو له قومي مشرانو سره هم وکتل. دغه هیئت د بابوس د ساحې، د بابوس د کوچیانو او د محمد آغې ولسوالۍ د دریو ساحو له قومي مشرانو او استازو سره وکتل او د هغوی خبرې یې واوریدې.
تخنیکي هیئت د ځمکو پر سر د هغوې ترمنځ رامنځ ته شوې ستونزې حل او فصل کړې او هغوی هم ژمنه وکړه چې نور به هیچا ته په امارتي ځمکو کې د کار اجازه نه ورکوي.
