دکاسي کلي له مخورو او اوسیدونکو سره د غور ولایت د تخنیکي هیئت رئیس کتنه
د غور ولایت د ځمکو د غصب د مخنیوي د تخنیکي هیئت رئیس د ۱۴۴۴ هجري قمري کال د رمضان میاشت په ۳ نېټه د شنبې په ورځ ددغه ولایت د مرکز اړوند د کاسي کلي له یو شمېر اوسیدونکو سره وکتل او خبرې ورسره وکړې.
په دغې کتنه کې د یاد کلي مخورو او اوسیدونکو وویل چې هغوی له کلنو راهیسې د پنبه کار ساحې او شاوخوا للمي ځمکه خپل واک کې لري او کرکیله په کې کوي. هغوي ددغه ولایت د تخنیکي هیئت له رئیس څخه په روان کال کې ددغو ځمکو د کرلو د اجازې غوښتونکي هم شول.
د غور ولایت د تخنیکي هیئت رئیس، د غصب شویو ځمکو د تصفيې، تثبیت او استرداد بهیر ملي او د هیواد په کچه یو پروسه یاده کړه چې د عالیقدر امیرالمومنین حفظه الله له فرمان سره سم په ټولو ولایتونو کې پرمخ وړل کیږي. دغه راز نوموړي د اړوند مقررې د تخنیکي هیئت او د هغه د مسوولیتونو په اړه هغوی ته معلومات وړاندې کړل.
د غور ولایت د تخنیکي هیئت رئیس ټینګار وکړ چې ددغه هیئت اجراآت د اسلامي شریعت، قوانینو او اړوندو کړنلارو په رڼا کې ترسره کیږي. نوموړي ددغو ساحو له متصرفینو څخه يې وغوښتل چې خپل د ملکیت سندونه له ویشل شویو استعلامونو سره سم دغه هیئت ته وړاندې کړي.
